Qutqarýshylar Balqash kólinde balyqshylardyń ómirin saqtap qaldy
QARAǴANDY. QazAqparat - Kúshti jel soǵyp, alty metrlik tolqyn oınaqshyp turǵanyna qaramastan, qutqarýshylar kólde adasyp ketken balyqshylardy izdestire berdi, dep habarlaıdy «QazAqparat» HAA tilshisi.
TJD-nyń kezekshi bólimine Saryshaǵan aýylynda turatyn áıel habarlasyp, 11 qarashada motorly qaıyqpen balyq aýlaýǵa ketken 51 jastaǵy kúıeýi men 19 jastaǵy uly jaǵalaýdan 15 shaqyrym jerde tolqynmen jalǵyz arpalysyp jatqanyn aıtyp habarlasady.
Qaıyqtyń motorynda aqaý bolǵan. «Nusqaýlyq boıynsha, qutqarýshylardyń túnde, kúshti jel turǵanda, tolqyn bıik bolǵanda sýǵa túsýine tyıym salynady. Balyqshylardy izdeýge tańerteń shyǵýǵa sheshim qabyldandy. Sonymen qatar qyzmetkerler áreń degende olarmen baılanys ornatyp, boljaldy ornyn anyqtap alyp, jaryqpen sıgnal berip otyrýyn surady», - deıdi Qaraǵandy oblystyq tótenshe jaǵdaılar departamentiniń resmı ókili Janna Dáýrenbekova.
«Tún ortasy aýǵan shaqta qutqarýshylar fonardyń álsiz jaryǵyn baıqap qalǵan soń qutqarý bólimshesiniń basshysy Berik Ahmetov katerdi sýǵa túsirip, jaryq kóringen tusqa júzýge buıryq berdi. Tolqynnyń bıiktigi alty metrge deıin jetetin edi, bul adasqandardyń boljaldy ornyn anyqtaýdy qıyndatyp jiberdi. Túngi úshte balyqshylar men qaıyq jaǵalaýǵa jetkizildi», - deıdi ol.
Qaraǵandy oblystyq TJD sý basseınderine barǵanda qaýipsizdik erejelerin qatań saqtaýdy keńes beredi. Daýyl soǵyp turǵanda, aqaýy bar qaıyqtarda, sondaı-aq jeke qutqarý quraldarynsyz sýǵa túsýge tyıym salynady.
