Qutqarýshylar Astananyń dabyl júıesin tekserip kórmek
ASTANA. QazAqparat - 27 sáýiri kúni 09 saǵat 00 mınýtta Astana qalasy Tótenshe jaǵdaılar departamentiniń ókilderi 2 mınýt boıy Astana qalasynyń dabyl júıelerine tekserý júrgizedi. Atalmysh tekserý josparly bolyp tabylady, dep habarlady Astana qalalyq Tótenshe jaǵdaılar departamentinen.
«Eske salamyz, tótenshe jaǵdaı oryn alǵan kezde nemese tótenshe jaǵdaıdyń oryn alýyna qaýip tóngen kezde elektrodabyldar nemese basqa da dabyl quraldary qosylady, ol «Barshańyzdyń nazaryna!» biryńǵaı qulaqtandyrý dabylyn bildiredi. Bul dabyldy estigen kezde turǵyndar mindetti túrde qolaıly aqparat qabyldaý quraldaryn (Habar, Qazaqstan, Eýrazııa birinshi arnasy, Astana, KTK, NTK telearnalarynan, Astana FM, Shalqar, Retro FM, Avtoradıo, Qazaq radıolaryn) is-áreketter týraly nusqaýlar men aqparat alý úshin qosýlary kerek»,-delingen
Astana qalasy TJ departamenti qala turǵyndaryn sabyrlyq saqtaýǵa, úreılenbeýge shaqyrady.
