Qutqarýshylar Arqalyq mańyndaǵy qar basqan aýyldan balaly áıeldi aýrýhanaǵa jetkizdi
QOSTANAI. QazAqparat - 5 aqpan kúni keshkisin tótenshe jaǵdaılar kezinde kómek kórsetý qyzmetine Arqalyqtan 80 shaqyrym qashyqtyqta ornalasqan Alýa aýylynan shuǵyl habar kelip túsken.
Jańa týylǵan sábıi bar jas anaǵa jedel túrde medıtsınalyq kómek qajet bolǵan, dep habarlaıdy «QazAqparat» HAA tilshisi.
Qostanaı oblystyq TJD baspasóz qyzmeti málim etkendeı, oqıǵa ornyna Soltústik óńirlik aeroutqyr jedel-qutqarý tobynyń arnaıy tehnıkasy shuǵyl jiberildi.
«Arqalyq bólimshesiniń mamandary «Nıva Marsh BRONTO» mashınasymen 1980 jylǵy áıel men onyń 2017 jyly týǵan sábıin evakýatsııalady», - delingen habarlamada.
Olar Arqalyq aımaqtyq aýrýhanasyna jetkizildi. Áıelge holetsıstıttiń asqynýy saldarynan ota jasaýǵa týra kelgen. Al, balany birneshe ýaqyt ótkesin ákesi úıine alyp ketti.
Qostanaı oblysynda búgin qatty burqasyn saldarynan barlyq tas joldar jabyldy.
