Qutqarýshylar A320 ushaǵy apatqa ushyraǵan jerden alǵashqy múrdelerdi alyp shyqty
ASTANA. QazAqparat - Qutqarýshylar sársenbi kúni keshke Frantsııadaǵy Alpi taýynda Germanwings áýe kompanııasynyń A320 jolaýshylar laıneriniń apatqa ushyraǵan jerinen alǵashqy múrdelerdi alyp shyqty, dep jazady TASS.
Bul týraly nemistiń DPA agenttigine Frantsııa polıtsııasynyń ókili habarlaǵan. Ol qutqarýshylar qansha adamnyń máıitin jetkizgenderin aıtpady.
Barselona-Dıýsseldorf baǵytymen ushqan A320 laıneri seısenbi kúni Provanstaǵy Alp taýynyń Trýa-Eveshe silemindegi Estrop shyńy mańynda apatqa ushyraǵan. 144 jolaýshy men 6 ekıpaj múshesi qaza tapty. Kóz jumǵandardyń kóbi Germanııa jáne Ispanııa azamattary.
