Qutqarýshy bolǵanymdy maqtan tutamyn - Anastasııa Astafeva
KÓKShETAÝ. QazAqparat - Qazaq sportynda halyqaralyq dúbirli dodalarda top jaryp, elimizdiń abyroıyn asqaqtatyp, bedelin ósirip júrgen arýlar az emes. Sondaı jannyń biri – esimi qazir sportsúıer qaýymǵa jaqsy tanys, Stepnogor qalalyq Tótenshe jaǵdaılar basqarmasynyń ınjeneri, azamattyq qorǵaý aǵa leıtenanty Anastasııa Astafeva, dep habarlaıdy QazAqparat tilshisi.
Memlekettik órtke qarsy qyzmet organyndaǵy eńbek jolyn 2015 jyly Aqmola oblysy Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń Zerendi aýyly №14 órt sóndirý bóliminde radıotelefonıst laýazymynan bastaǵan ol qazirgi tańda ol Stepnogor qalasy boıynsha Tótenshe jaǵdaılar basqarmasynda ınjener bolyp qyzmet atqarady.
Osy qysqa ýaqyttyń ishinde ol mol tájirıbe jınaqtap, áriptesteriniń maqtanyshyna aınalǵan Anastasııa Astafeva talaı asýdy baǵyndyryp ta úlgergen.
Atap aıtsaq, Anastasııa respýblıkamyzdyń shyǵý satysymen kóterilýden rekordsmen. Sonymen qatar, ol 2019 jyly Saratov qalasynda ótken órt sóndirý-qutqarý sporty boıynsha Álem chempıonatynda elimizdiń namysyn qorǵap, kúmis júldege qol jetkizdi. Qazaqstannyń atyn 30-dan astam eldiń sportshylary qatysqan halyqaralyq chempıonatta abyroımen alyp shyqty.
Anastasııa Astafeva QR Ulttyq quramasynyń quramynda 2019 jyldyń aqpan aıynda ótken úshinshi álem chempıonatynda óner kórsetti, osy dodada elimizdiń quramasy jalpykomandalyq úshinshi júldeli orynǵa ıe boldy.
Azamattyq qorǵaý organdarynda qyzmet atqarý barysynda órt-qutqarý sportynyń damýyna eleýli úles qosqanyn jáne halyqaralyq dárejedegi sport sheberi ataǵyn alǵanyn atap ótken jón. Qazaqstan Respýblıkasynyń órt-qutqarý sporty boıynsha qurama komandasynyń quramyna kiredi. «Oqý munarasynyń ekinshi qabatynyń terezesine satymen kóterilý» boıynsha Qazaqstan Respýblıkasynyń qazirgi rekordsmeni jáne Qazaqstan Respýblıkasynyń 5 dúrkin chempıony.
Óskemen qalasynda ótken Qazaqstan Respýblıkasynyń qysqy chempıonatynda «Oqý munarasynyń ekinshi qabatynyń terezesine shyǵý satysymen kóterilý» boıynsha birinshi oryn ıelendi.
Udaıy jattyǵyp, óziniń dene shymyrlyǵyn jetildirip otyratyn onyń alǵan asýynan, baǵyndyrary belesteri kóp.
Batyl, qaıtpas qaısar, temirdeı tártip pen taýsylmas tózim. Atalǵan qasıetterdiń barlyǵy qutqarýshy degen qadirli mamandyq ıesi Anastasııanyń boıynan kórýge bolady. Jumysynyń ár kúnin táýekelge bel baılap ótkizetin ol mamandyǵyn maqtan tutady.
«Qalaı bolǵanda da qutqarýshy qaýipi men qateri bar qyzmet qoı. Dese de, osyndaı abyroıly qyzmette el úshin eńbek etip júrgenimdi maqtan etemin», - deıdi Anastasııa Astafeva.
