Qutqarýshylarǵa turǵyn úı tólemderi qalaı beriledi

ASTANA. KAZINFORM — Tótenshe jaǵdaılar vıtse-mınıstri Kegen Tursynbaev qutqarýshylarǵa arnalǵan turǵyn úı tólemderi qalaı beriletinin túsindirdi. 

Onyń aıtýynsha, bıyl shamamen 18 myń TJM qyzmetkeri turǵyn úı járdemaqysymen qamtylady. Tólem kólemi turǵyn úı baǵasynyń ózgerýine, ınflıatsııa deńgeıine, qyzmet ótkeretin óńirine jáne otbasy jaǵdaıyna baılanysty ózgerip otyrady.

− Mysaly, Astanada shamamen 92 myń teńge. Bul soma jyl saıyn ózgerip otyrady. Úkimet turǵyn úıdi jalǵa alý qunyn retteıdi. Óskemende − 49 myń teńge, Semeıde − 48 myń teńge. Ár qalada bir adamǵa arnalǵan tólem somasy Úkimet qaýlysymen bekitiledi, − dedi Kegen Tursynbaev Senat kýlýarynda.

Vıtse-mınıstrdiń aıtýynsha, tórt adamnan turatyn otbasy úshin Úkimet qaýlysymen shartty túrde 50 myń teńgeden belgilenedi. Osylaısha, bir otbasyǵa 200 myń teńge taǵaıyndalady.

− Zań 30 maýsymda kúshine engen soń, turǵyn úı tólemderi bastalady. Sol ýaqytqa deıin biz ózimizdiń zańǵa táýeldi aktilerimizdi daıyndaýymyz qajet. Turǵyn úı tólemi týraly arnaıy ereje qabyldanady. Bizde bul ispen aınalysatyn arnaıy bólim jumys isteıtin bolady: kimge tólenetinin, kimge tólenbeıtinin anyqtaıdy, — dep tolyqtyrdy vıtse-mınıstr.

Aıta keteıik, Senat «QR keıbir zańnamalyq aktilerine azamattyq qorǵaý, elektr energetıkasy jáne memlekettik múlikti basqarý máseleleri boıynsha ózgerister men tolyqtyrýlar engizý týraly» zańdy ekinshi oqylymda maquldady.

Onda azamattyq qorǵaý organdarynyń qyzmetkerleri men olardyń otbasylaryna turǵyn úı járdemaqysy, kóterme tólemder jáne jeke múlkin kóshirý shyǵyndaryn óteý qarastyrylǵan.

Sondaı-aq, áskerı nemese tótenshe jaǵdaı kezinde, terrorızmge qarsy operatsııalar nemese tótenshe jaǵdaı jarııalanǵan aýmaqta apattyq-qutqarý jumystaryn júrgizý kezinde qyzmetkerlerge 3 ese mólsherde aqshalaı ótemaqy tóleý kózdelgen.