Qutqarýshylarǵa qarsylyq emes, qoldaý kórsetý kerek – Oljas Bektenov
ASTANA. KAZINFORM – Qutqarýshylardyń jumysyn qıyndatpaı, olarǵa qarsylyq emes, kerisinshe, qoldaý kórsetý kerek. Bul týraly Úkimet otyrysynda Premer-Mınıstr Oljas Bektenov aıtty.
«Maǵan úı-jaılaryn tastap ketkisi kelmeıtin turǵyndardyń áreketi evakýatsııalaý jumystaryn qıyndatyp jatqany týraly aıtyldy. Olar sý tasqynynyń aýyr zardaptaryna sengileri kelmeıdi. Kórip otyrǵanymyzdaı, bıyl mundaı apat sý tasqyny buryn-sońdy bolmaǵan jerlerde de oryn alýda. Sondyqtan qazaqstandyqtardy ákimdikter men arnaıy qyzmetterdiń habarlamalaryna erekshe mán berip, olardyń nusqaýlaryn oryndaýlaryn suraımyn. Bul adam ómirin saqtap qalýǵa múmkindik beredi. Evakýatsııalaý – birinshi kezekte, Sizderdiń qaýipsizdikterińizdi qamtamasyz etýge baǵyttalǵan. Sondyqtan qutqarýshylardyń jumysyn qıyndatpaı, olarǵa qarsylyq emes, kerisinshe, qoldaý kórsetý kerek. Olar sizder úshin ter tógip jatyr. Al adamdardy qutqarý ońaı jumys emes», - dedi Úkimet basshysy.
Premer-Mınıstr ókinishke qaraı, Batys Qazaqstan oblysynda serjant Batyrbek Qapsyqov qyzmettik mindetin atqarý kezinde eki birdeı pyshaq jaraqatyn alǵanyn, qylmysker ustalǵanyn aıtty.
«Kúshtik qurylymdardyń qyzmetkerleri men qutqarýshylar shyn máninde batyldyq kórsetip jatyr. Al Aqtóbe oblysynda tasqyn jaǵdaıynda júkti áıeldi bosandyryp alýǵa týra keldi – anasy men jańa týǵan egizderdi qutqaryp qaldy. Osy múmkindikti paıdalana otyryp, men qazirgideı qıyn jaǵdaıda el turǵyndaryna kómek qolyn sozyp jatqan qutqarýshylarǵa, ushqyshtarǵa, Іshki ister, Qorǵanys mınıstrlikterine men Ulttyq ulannyń qyzmetkerlerine, medıtsına qyzmetkerlerine jáne qatardaǵy eriktilerge alǵysymdy bildirgim keledi», - dedi Oljas Bektenov.
