Qutqarýshylar jeke kólikti qar qursaýynan shyǵarýǵa mindetti emes – QR TJM

ASTANA. KAZINFORM – QR TJM Tótenshe jaǵdaılardy joıý departamenti bastyǵynyń orynbasary Aslan Ýákishev qar qursaýynan adamdardy qutqarý kezinde qandaı qıyndyqtar týyndaıtynyn aıtyp berdi.

Onyń aıtýynsha, keı júrgizýshiler oryndarynan qozǵalmaı, qutqarýshylardan kólikterin qar úıindisinen shyǵaryp berýin suraıdy. 

– Olar eshqaıda ketkileri kelmeı, tehnıkany tolyq shyǵaryp, ony qajetti jerge jetkizip berýimizdi talap etedi. Eger biz ár kólikpen jeke aınalysatyn bolsaq, shynymen qaýipti jaǵdaıdaǵy adamdardy qutqarýǵa ýaqytymyz jetpeı qalady, – dep túsindirdi spıker Ortalyq kommýnıkatsııalar qyzmetindegi brıfıngte.

TJM ókili qutqarýshylardyń mindeti – qater tóngen adamdardy evakýatsııalaý jáne olarǵa kómek kórsetý ekenin eske saldy. Al kólikterdi qar úıindisinen shyǵarý olardyń mindetine kirmeıdi. 
Sondaı-aq, habarlamalar men belgilerdi elemeý úshin QR Ákimshilik quqyqbúzýshylyqtar týraly kodeksinde tıisti bap bar jáne aıyppul salý múmkindigi qarastyrylǵan. Bul týraly QR Іshki ister mınıstrligi Ákimshilik polıtsııa komıtetiniń resmı ókili Aqtoty Boranova Kazinform agenttiginiń podkastynda aıtyp bergen edi.

 Buǵan deıin Aslan Ýákishev Aqmola oblysyndaǵy 95 avtokóliktiń soqtyǵysý sebebin aıtty.