Vıtse-premer Nurlan Baıbazarov otandyq IT-kompanııalarmen startaptardy qoldaý sharalaryn talqylady
ASTANA. KAZINFORM - Premer-Mınıstrdiń orynbasary – ulttyq ekonomıka mınıstri Nurlan Baıbazarov pen tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Astana Hub IT-startaptar halyqaralyq tehnoparkin aralap, oǵan qatysýshylarmen kezdesti.
Sondaı-aq birqatar otandyq ınnovatsııalyq jobalarmen tanysty, dep habarlaıdy Úkimettiń resmı saıty.
Astana Hub IT bıznes úshin ekojúıeni qurý jáne damytý, IT mamandaryn daıarlaý ári startap jobalardy qoldaý boıynsha belsendi jumys atqarýda. Búgingi tańda tehnoparkte 1,5 myńǵa jýyq IT-kompanııa tirkelgen, onyń 400-den astamy sheteldikterdiń qatysýymen.
Máselen, Alaqan startapy – alaqan tamyrlaryn taný arqyly kontaktisiz tólem júıesi. Naryqtaǵy joba 2020 jyldan bastap búgingi kúnge deıin 3 ónimge ıe: Alaqan Pay, Alaqan Mektep jáne Alaqan HR. Alaqan júıesinde 100 myń belsendi tutynýshy bar. Atalmysh júıe aıyna 1,2 mln ıdentıfıkatsııa ári tartylǵan $300 myń ınvestıtsııany quraıdy.
Taǵy bir tyń joba – NeuronOil. Bul mashınalyq oqytýmen uńǵymaaralyq sandyq modeldeýdi qoldanatyn munaı ken oryndaryn ıgerýdiń veb-trenajeri. Tehnologııa josparlanǵan óndiris kólemin saqtaı otyryp, shyǵyndardyń ósýinsiz kúndelikti munaı óndirýdi arttyrýǵa nemese shyǵyndardy azaıtýǵa múmkindik beredi.
Sondaı-aq jahandyq ekspansııaǵa baǵyttalǵan, bolashaǵy zor qazaqstandyq EdTech startapy CodiPlay-dyń jumysy tanystyryldy. Joba Qazaqstan, Ózbekstan, Ońtústik Koreıa, Qatar, Ázerbaıjan, Indonezııa jáne Ulybrıtanııa mektepterin óz júıesine qosý arqyly jasandy ıntellekt pen vırtýaldy shyndyqty paıdalanady.
Kezdesý barysynda startaptardy qoldaý sharalary, naqty ınnovatsııalyq jobalardy kommertsııalandyrý, sondaı-aq Prezıdenttiń IT-qyzmetter eksportynyń kólemin $1 mlrd-qa deıin arttyrý týraly tapsyrmasyna sáıkes startaptardy venchýrlyq qarjylandyrý máseleleri talqylandy.
