Qutqarýshylar Sibe kólderinde shomylý qaýipti ekenin eskertti
ÓSKEMEN. KAZINFORM – Shyǵys Qazaqstan oblysynyń qutqarýshylary óńirdegi adam ómirine qaýip tóndirýi múmkin sý aıdyndaryn atady.
ShQO Tótenshe jaǵdaılar departamentiniń mamandary óńir turǵyndary jıi baratyn demalys oryndarynyń biri - Sibe kólderinde shomylýdyń qaýpi bar ekenin málim etti. Syrt kózge tynyq kórinetin sýda barynsha abaı bolǵan jón.
- Sibe kólderinde jerasty bulaqtary bar jáne keı jerleriniń tereńdigi 40 metrden asady. Sondyqtan bul kólderdi tolyqtaı qaýipsiz deýge bolmaıdy, - dep habarlady vedomstvo ókilderi.
Sonymen qatar qutqarýshylar qaýipsizdik talaptaryn qatań saqtap, tek arnaıy jabdyqtalǵan oryndarda shomylý qajettigin atap ótti.
- Kólderde arnaıy qorshalǵan jaǵajaılar men uıymdastyrylǵan demalys aımaqtary bar. Eger tek sol oryndarda shomylsa, qaýip aıtarlyqtaı azaıady, - delingen aqparatta.
Óskemen qalasy aýmaǵyndaǵy Úlbi men Ertis ózenderi de shomylýǵa qaýipti sý aıdyndarynyń qatarynda. Buǵan negizgi sebep – aǵynnyń qatty bolýy.
- Qala mańynda tolyqtaı qaýipsiz sý aıdyndary joq. Úlbi men Ertiste aǵys óte qatty. Sondyqtan sýǵa túsý asa qaýipti, - dep eskertti TJD mamandary.
Eske salsaq, osyǵan deıin Óskemende eki adam Úlbi ózenine batyp ketkeni habarlanǵan.
