Qutqarýshylar Pavlodardaǵy Sholaqsor aýylyn tasqyn sýdan aman alyp qaldy
PAVLODAR. KAZINFORM - Jergilikti atqarýshy organdar men TJD kúshteri aýyl aınalasyndaǵy bóget pen topyraq úıindilerin nyǵaıtyp, sýdyń kirýine jol bermedi. Óńirde qazirgi ýaqytta 10 ýchaske baqylaýda tur.
Pavlodar oblysynda sý tasqynyna qarsy is-sharalar jalǵasyp jatyr. Buǵan deıin Aqtoǵaı aýdanynyń Jalaýly aýylynda tótenshe jaǵdaı jarııalanǵany týraly habarlaǵan edik.
Aqtoǵaı aýdanyndaǵy Sholaqsor aýyly da qaýip kózinde qalǵan bolatyn. Jergilikti atqarýshy organdardyń ókilderi men TJD qyzmetkerleri kúsh biriktirip, aýyldy topan sýdan aman alyp qaldy.
«Sholaqsor aýylynyń aınalasyndaǵy topyraq úıindisi, bóget topyraqpen jáne qum toltyrylǵan qapshyqtarmen nyǵaıtyldy. Aýylǵa kiretin joldyń aınalasy da bıiktetildi. Osylaısha turǵyn úıler men jergilikti uıymdardy sý basýǵa jol berilmedi. 2 tehnıka jáne 2 júzý quraly jumyldyryldy. Atalǵan eldi mekendegi sý deńgeıiniń ózgerýin TJD-nyń 6 qyzmetkeri baqylap otyr. Barlyq tartylǵan kúshter men quraldar qazir Jalaýly aýylyna baǵyttaldy», - dep habarlady óńirlik tótenshe jaǵdaılar departamentinen.
Búgin tańerteńgi jaǵdaı boıynsha avtokólik joldarynyń bir bóliginde jáne Pavlodar, Aqtoǵaı, Tereńkól, Ýspen, Ertis jáne Sharbaqty aýdandary boıynsha jalpy sany 10 ýchaskedegi jaǵdaı baqylaýda turǵany belgili boldy.
Oblys boıynsha sý tasqynyna qarsy is-sharalarǵa barlyǵy 435 adam, 145 tehnıka, 47 motopompa, 2 júzý quraly jumyldyrylǵan. Ótken táýlikte 108 876 tekshe metr sý sorylyp, 2850 qap, 150 tonna ınertti materıal tóseldi.
Óńirlik bilim berý basqarmasy Aqtoǵaı aýdanyna qarasty Shuǵa jáne Jalaýly aýyldarynyń oqýshylary tórtinshi toqsandy qashyqtan oqı bastaǵanyn habarlady. Jalpy sany 104 bala onlaın túrde bilim alyp jatyr.
