Qutqarýshylar órt kezinde páterden shyǵýǵa bolmaıtyn jaǵdaılardy atady
ASTANA. KAZINFORM — Kópqabatty turǵyn úıdiń kireberisinde tútin baıqalǵan jaǵdaıda sabyr saqtap, durys áreket etý mańyzdy. Qate qabyldanǵan sheshim sizdiń ómirińiz ben densaýlyǵyńyzǵa qaýip tóndirýi múmkin.
Tótenshe jaǵdaılar mınıstrligi baspasóz qyzmetiniń málim etkenindeı, eń bastysy — úreıge boı aldyrmaı, tútin basqan aýmaq arqyly ózdiginen shyǵýǵa áreket jasamaý.
Sonymen kópqabatty úıdiń kireberisin tútin bassa, qalaı áreket etý kerek:
— Kireberis esikti ashpas buryn onyń qyzyp ketpegenin tekserińiz. Eger esik ystyq bolsa nemese sańylaýlarynan tútin kirse, ony ashpańyz.
— Eger kireberisti tútin bassa, páterden shyqpańyz. Órt oshaǵy kórinbese de, tútin arasymen ótýge tyryspańyz.
— Kireberis esikti myqtap jabyńyz. Tútinniń ishke enýin azaıtý úshin esik sańylaýlaryn múmkindiginshe dymqyl matamen bekitińiz.
— Terezeler men bólme esikterin jabyńyz. Bul tútinniń páter ishinde taralýyn shekteýge kómektesedi. Múmkindiginshe kireberisten alys ornalasqan bólmege ótińiz.
— Oqıǵa týraly dereý 112 nómirine habarlańyz. Naqty mekenjaıdy, kireberis pen páter nómirin, qabatty aıtyńyz. Sondaı-aq páterde balalar, qarttar nemese kómekke muqtaj adamdar bar-joǵyn habarlańyz.
— Qutqarýshylarǵa ornalasqan jerińizdi bildirińiz. Eger qaýipsiz bolsa, tereze nemese balkon arqyly belgi berińiz. Páterden ózdiginen shyǵýǵa áreket jasamańyz.
— Esińizde bolsyn: lıftini paıdalanbańyz jáne tútin basqan kireberis arqyly ótýge tyryspańyz. Tútin men janý kezinde bólinetin ýly zattar aýyr ýlanýǵa ákelip, adam ómirine eleýli qaýip tóndiredi. Órt qaýipsizdigi erejelerin saqtaý jáne tótenshe jaǵdaıda durys áreket etý — ómir men densaýlyqty qorǵaýdyń mańyzdy kepili. Ózińizdi jáne jaqyndaryńyzdy saqtańyz! — dep eskertti qutqarýshylar.
Osydan buryn Qoıandyda qutqarýshylardyń jańa bazasy ashylǵanyn jazǵanbyz.