Qyzylordalyq qutqarýshylar Oral qalasyndaǵy saıajaı turǵyndaryn kóshirip jatyr
ORAL. KAZINFORM — Batys Qazaqstanǵa Qyzylorda oblysynan kómekke kelgen qutqarýshylar birneshe kún boıy Oral qalasyndaǵy saıajaı aýmaqtarynan adamdardy evakýatsııalap jatyr.
Qyzylorda oblystyq TJ departamenti tótenshe jaǵdaılardyń aldyn alý bóliminiń bastyǵy, azamattyq qorǵaý podpolkovnıgi Beıbithan Spanov málim etkendeı, qyzylordalyq qutqarýshylar aldymen 31 naýryz kúni Aqtóbe oblysyna barǵan edi.
Beıbithan Orazaıulynyń sózine qaraǵanda, 35 qyzmetker 3 tehnıka, 10 sý soratyn motopompa, 2 motorly qaıyǵymen Áıteke bı aýdany Áıke eldi mekeninde 7 sáýirge deıin turǵyndardy evakýatsııalaýmen qatar monıtorıng jumystaryn júrgizdi.
«Ortalyq shtabtyń tapsyrmasyna sáıkes 7 sáýirde Qostanaı qalasyna keldik. Onda motopompalarmen 31 myńnan astam tekshe metr sý sorylyp, basqa da is-sharalarymyzdy aıaqtaǵannan keıin mınıstrliktiń tapsyrmasymen 14 sáýirde Batys Qazaqstan oblysy, Oral qalasyna at basyn tiredik. Kúni búginge deıin 100-ge jýyq adam evakýatsııalanyp, úı janýarlary qaýipsiz jerlerge shyǵaryldy. Qazirgi tańda 68 qyzmetker 6 tehnıka, 20 motopompa, 6 qaıyqpen Jaıyq ózeni jaıylmalarynda ornalasqan 1, 2 jáne 3-saıajaı alaptarynda osyndaı jumystardy atqaryp jatyr», - dedi Kazinform tilshisine B. Spanov.
BQO TJ departamenti osyndaı qysyltaıań kezde kómekke kelip, batysqazaqstandyq qutqarýshylarmen birge tize qosyp, ýaqytpen sanaspaı, qyzý jumystanyp jatqan qyzylordalyq áriptesterine alǵysyn aıtty.
Qyzylorda oblystyq TJ departamentiniń baspasóz hatshysy Aıgúl Nurmanovanyń naqtylaýynsha, Oral qalasyna barlyǵy eki top bardy. B. Spanov — 2-toptyń basshysy. Úshinshi top 6 tehnıkamen búgin keshke jetedi.
«Jalpy, Qyzylorda oblysy TJD qyzmetkerleri 26 naýryzdan beri sý basqan aýmaqtarda, Qostanaı, Aqtóbede eńbek etti. Qazirgi kezde qyzmetterin Oral qalasynda jalǵastyrýda», - dedi A. Nurmanova.
Oral qalasy Zachagan kentindegi Komıntern aýyly Jaıyq ózeniniń jaǵalaýynda ornalasqany belgili.
Qalanyń qaýipti tustarynyń biri sanalatyn Komınternde bógetti bekitý jumystary júrgizilip jatyr.
«Qyzylordalyq qutqarýshylar Oralda jan-tánimen berile jumystanyp jatyr. Bizge jandary ashyp, qutqarýda. Jigitterdiń bári de qaıyrymdy jandar eken. Shyn júrekten rızashylyǵymdy bildiremin», - dedi Komıntern aýylynyń turǵyny Nadejda Molotkova.
Eske sala keteıik, budan buryn sý tasqynyna baılanysty BQO-da apattyq-qutqarý jumystaryna 8 200-den astam adam jumyldyrylǵanyn jazǵan edik.
Sondaı-aq Oraldyń qaýipti tustarynda 27 shaqyrymǵa jýyq bóget bıiktetilip jatyr.
Batys Qazaqstanda tasqynnan japa shekken 863 otbasy áleýmettik kómek aldy.
