Qutqarýshylar men áskerıler Mahambet aýdanyndaǵy Saraıshyq aýylyna kómekke keldi
ATYRAÝ. KAZINFORM – Atyraý oblysynyń Mahambet aýdanyndaǵy Saraıshyq aýylyna qutqarýshylar men áskerıler kómekke keldi. Óıtkeni ortaǵasyrlyq Saraıshyq qalashyǵy men arheologııalyq qazba oryndaryndaǵy ejelgi qorymdardy sý basý qaýpi bar.
Atyraý oblysynyń jedel shtabynan málim etkendeı, munaıly óńirdegi tótenshe jaǵdaılar departamentiniń 40-qa jýyq qyzmetkeri Inder aýdanynan atalǵan aýylǵa kómekke jiberilgen.
«Qazir Saraıshyq aýylynda Jaıyq ózeniniń jaǵalaýyn nyǵaıtý jumystaryna Qorǵanys mınıstrligi «Batys» óńirlik qolbasshylyǵynyń 60, Tótenshe jaǵdaılar mınıstrliginiń Qaraǵandy oblysyndaǵy 52859 áskerı bóliminiń 25 qyzmetkeri jumyldy. Eki arnaıy tehnıka bar. Qutqarýshylar men áskerı qyzmetshiler ortaǵasyrlyq qalashyqtyń aınalasyndaǵy qorǵanys qorshaýyn nyǵaıtýǵa tartylady», - dep habarlady oblystyq jedel shtabtan.
Eske sala ketelik, buǵan deıin Jaıyq ózeninen ortaǵasyrlyq Saraıshyq qalashyǵyna qater tónbeıtinin habarlaǵan bolatynbyz.
