Qutqarýshylar Kólsaıda jylan shaqqan 16 jastaǵy qyzdy aýrýhanaǵa jetkizdi
ASTANA. KAZINFORM — Almaty oblysyndaǵy Kólsaı kólderi aýmaǵynda jylan shaqqan 16 jastaǵy jasóspirimge Tótenshe jaǵdaılar mınıstrliginiń qutqarýshylary jedel kómek kórsetti, dep habarlaıdy vedomstvonyń baspasóz qyzmeti.
TJM málimetinshe, Kólsaı kólderi aýmaǵynda kezekshilik atqaryp júrgen jedel-qutqarý jasaǵynyń qyzmetkerlerine demalýshylar júginip, 16 jastaǵy qyzdy jylan shaqqany týraly habarlaǵan.
Qutqarýshylar zardap shekken jasóspirimge ámbebap qutqarý beketinde alǵashqy medıtsınalyq kómek kórsetip, keıin qyzmettik avtokólikpen jaqyn mańdaǵy medıtsınalyq mekemege jetkizdi.
Oqıǵaǵa baılanysty Tótenshe jaǵdaılar mınıstrligi turǵyndar men týrısterdi jyly mezgilde tabıǵat aıasynda demalý kezinde saq bolýǵa shaqyrdy.
Vedomstvonyń málimetinshe, bul kezeńde jylandardyń belsendiligi artady. Osyǵan baılanysty belgilengen týrıstik soqpaqtardan shyqpaý, demalys ornyn aldyn ala muqııat tekserý, jylandarǵa jaqyndamaý jáne olardy ustaýǵa áreket jasamaý usynylady.
Sondaı-aq jylan shaqqan jaǵdaıda ýaqyt joǵaltpaı medıtsınalyq kómekke júginip, 112 nómirine habarlasý qajet ekeni eskertildi.
Budan buryn Shymkentte jylan kóbeıip, turǵyndardan 150-ge jýyq shaqyrtý túskenin jazǵanbyz.
