Qutqarýshylar elordalyqtardy muz ústine shyqpaýǵa shaqyrdy

Jańa jyldyq merekeler kezinde elordada aýa raıy -2-den +1 gradýsqa deıin jylynady, bul muzdyń kúrt erýine jáne qalyńdyǵynyń tómendeýine ákeledi. Qutqarýshylar astanalyqtarǵa eskertý jasap, sý aıdyndaryna barýdan bas tartýdy suraıdy, dep habarlaıdy Kazinform elorda ákimdiginiń resmı saıtyna silteme jasap. 

Jeltoqsan aıynyń sońyna qaraı aýa temperatýrasynyń joǵarylaýy muzdyń erýine jáne onyń juqarýyna áser etedi.

Osyǵan baılanysty, muzda bolǵan kezde kútpegen jáne tótenshe jaǵdaılardy boldyrmaý úshin Astana qalasynyń Tótenshe jaǵdaılar departamenti elorda akvatorııalarynyń muz betinde qandaı da bir buqaralyq sporttyq is-sharalardy, oıyndardy, syrǵanaýlardy ótkizýden bas tartýdy usynady.

Muzda qaýipsiz bolýdyń negizgi sharty onyń qalyńdyǵynyń qosa berilgen júktemege sáıkestigi: bir adam úshin – keminde 10 santımetr, al buqaralyq sporttyq, merekelik is-sharalardy jáne avtokólik ótkelderin uıymdastyrý úshin keminde 25 santımetr.