Qutqarýshylar Bozjyra mańynda balshyqqa batqan eki týrıstik avtobýsty shyǵardy
ASTANA. KAZINFORM — Mańǵystaý oblysynda qutqarýshylar Bozjyra shatqaly mańynda balshyqqa batyp qalǵan týrısterge kómek kórsetti, dep habarlaıdy Tótenshe jaǵdaılar mınıstrligi.
Mańǵystaý oblysy «Bozjyra» shatqaly mańynda dalalyq jolda qolaısyz aýa raıy saldarynan eki avtobýs batpaqqa batyp qalǵan.
Oqıǵa ornyna TJM kúshteri men quraldary jiberildi. Qutqarýshylar kelgen kezde avtobýstardyń ishinde 50 adam bolǵan.
Arnaıy tehnıkanyń kómegimen qutqarýshylar kólikterdi joldyń tazartylǵan bóligine shyǵaryp, týrısterdiń saparyn ári qaraı jalǵastyrýyna járdem berdi.
Aıta keteıik, jýyrda Qaraǵandyda qutqarýshylar batpaqqa batqan eki jasóspirimdi aman alyp shyqty.
Al Kólsaıda qutqarýshylar tómenge jyljyp ketken shaǵyn avtobýsty saıdan shyǵardy. Eske sala ketsek, Almaty oblysynda «Kólsaı kólderi» ulttyq parkiniń aýmaǵynda mıkroavtobýs eńisten syrǵyp ketip, shamamen 150 metrge tómen qulap túsken.
