Qutqarýshylar Almatyda taý bókterindegi órtti sóndirip jatyr
ALMATY. KAZINFORM — Almaty qalasynyń Medeý aýdanynda Kensaı-1 aýmaǵynda taý bókterinde órt shyqty. Bul týraly TJM habarlady.
Órttiń jalpy aýdany shamamen 15 gektar.
— Taýly jer bederi, tik jartastar jáne órt sóndirý tehnıkasy úshin jol qatynasynyń shekteýli bolýy órtti sóndirý jumystaryn qıyndatty, — delingen TJM habarlamasynda.
Jumystar qolda bar quraldar men aspaly órt sóndirgishterdi qoldana otyryp júrgizilip jatyr.
Oqıǵa ornynda jeke quramnan 50-ge jýyq qyzmetker jáne 20-dan astam tehnıka, sonyń ishinde jergilikti atqarýshy organdardan sý tasymaldaıtyn mashınalar jumyldyrylǵan.
Turǵyn úılerge qaýip joq. Qazirgi ýaqytta órtti oqshaýlaý jáne joıý jumystary júrgizilip jatyr.
Aıta ketelik Almaty mańyndaǵy taýly aımaqta qurǵaq shóp órtengeni týraly jazǵan edik.