Qutqarýshylar Almaty taýlarynda qar kóshkini júrý qaýpi bar ekenin eskertti

ALMATY. KAZINFORM — Almatynyń taýly aımaqtarynda ózdiginen qar kóshkini júrýi tirkeldi, dep habarlaıdy qalalyq tótenshe jaǵdaılar departamenti.

Kishi Almaty jáne Úlken Almaty ózenderiniń basseınderinde bıik taýlardan (teńiz deńgeıinen 3000 metrden jáne odan joǵary) jáne orta taýlardan (teńiz deńgeıinen 2000-nan 3000 metrge deıin) kóshkinderdiń ózdiginen túsýi anyqtaldy.

— Zardap shekkender týraly aqparat túsken joq, biraq Almaty qalalyq tótenshe jaǵdaılar departamenti jaǵdaıdyń odan ári shıelenisýine jol bermeý úshin almatylyqtar men qala qonaqtaryna taýǵa barýdy keıinge qaldyrýdy usyndy. Eki ózen basseıninde de Tuıyqsý muzdyǵyna (Edelveıs qar kóshkini aımaǵy) aparatyn joldaǵy ekopostta baqylaý-ótkizý beketteri ornatylyp, kólikterdiń qozǵalysyna shekteý qoıyldy, — delingen habarlamada.

Qazgıdromettiń daýyldy eskertýine sáıkes, Almatyda 8 naýryzda túnde jáne tańerteń keı jerlerde tuman túsedi. Medeý, Bostandyq aýdandarynyń taýly aımaqtarynda ońtústik-shyǵystan jel soǵady, ekpini sekýndyna 15-20 metrge jetedi.

Aıta keteıik, TJM qazaqstandyqtardy kóshkin qaýpine baılanysty taýǵa barmaýǵa shaqyrdy. «Qazseldenqorǵaý» mamandary tótenshe jaǵdaılardyń aldyn alý maqsatynda elimizdiń taýly aımaqtaryndaǵy qar kóshkini qaýpi bar ýchaskelerdi turaqty túrde baqylap, tekserip otyrady.

Buǵan deıin 8 naýryzda birqatar óńirde aýa raıyna baılanysty eskertý jasaldy.