Qutqarýshylar Almaty taýlarynda adasyp qalǵan tórt adamdy alyp tústi
ASTANA. KAZINFORM — Taýda adasyp qalǵan tórt adamǵa qutqarýshylar kómek kórsetti, dep habarlaıdy TJM baspasóz qyzmeti.
Almaty qalasynyń Medeý aýdanynda, Býtakov sarqyramasy mańynda, teńiz deńgeıinen 2400 metrden astam bıiktikte tórt adam taýdan túsý kezinde adasyp qalǵan.
Almaty qalasynyń Monıtorıng jáne jedel áreket etý ortalyǵynyń qutqarýshylary týrısterge kómek kórsetip, olardy Qotyrbulaq shatqalyna, avtojolǵa deıin alyp tústi.
— Azamattarǵa medıtsınalyq kómek qajet bolǵan joq. Olar keıin óz betterinshe úılerine qaıtty, — delingen habarlamada.
Buǵan deıin Almaty taýlarynda Koreıa azamatyn izdeýge 102 adam jumyldyrylǵany belgili boldy.
