Qutqarýshylar Almaty taýlarynda adasyp ketken eki jasóspirimge járdemdesti
ASTANA. KAZINFORM — Sátbaev shyńynan tómen túsý kezinde 16 jastaǵy eki týrıst Treýgolnık shyńynyń mańynda baǵyttan jańylyp, qarańǵy túsken soń olar joldy óz betinshe jalǵastyra almaı, qutqarýshylardan kómek suraǵan. Bul týraly TJM málim etti.
Habar túsken boıda izdeý jumystaryna TJM Respýblıkalyq qutqarý qyzmetiniń «Barys» bólimshesi attandy.
— Qutqarýshylar «Medeý» beketinen shyǵyp, jasóspirimder bolýy múmkin aýmaqqa baǵyt aldy. Túngi ýaqytta kúrdeli taýly jer bederimen júrý ońaı bolǵan joq. Týrısterge jetý úshin qutqarýshylarǵa úsh saǵattan astam ýaqyt qajet boldy. Іzdeý nátıjesinde jasóspirimder Treýgolnık shyńynyń eteginen tabyldy, — delingen habarlamada.
Tótenshe jaǵdaılar mınıstrliginiń málimetinshe, olardyń jaǵdaıy qanaǵattanarlyq boldy, medıtsınalyq kómek qajet bolmaǵan.
Keıin anyqtalǵandaı, jas týrıster bıik taýly baǵytqa jetkilikti daıyndyqsyz shyqqan. Olardyń jabdyqtary joryq talaptaryna saı kelmegen, al qarańǵylyq olardy baǵyttyń kúrdeli bóliginde qarsy alǵan.
Qutqarý operatsııasy aıaqtalǵan soń mamandar jasóspirimderdi qaýipsiz túrde taýdan túsirip, qalaǵa jetkizdi.
— TJM taýǵa shyǵar aldynda baǵytty aldyn ala josparlaýǵa, aýa raıyn baqylaýǵa, qaıtý ýaqytyn durys esepteýge jáne qolaıly kıim men aıaq kıim tańdaýǵa keńes beredi, — dep eskertti vedomstvodan.
Eske sala keteıik, buǵan deıin týrıstik aımaqtarda ámbebap qutqarý bólimsheleri ashylatynyn jazdyq.
