Qutqarýshylar Alan-2 arnaıy mashınasyn synaqtan ótkizýde
ASTANA. KAZINFORM — 22 qańtardan bastap Qazaqstan Qarýly Kúshteriniń TJM 52859 áskerı bólimi men «Spassk» oqý ortalyǵynyń bazasynda «Alan-2» brondy dońǵalaqty mashınasynyń bazasynda ótimdiligi joǵary radıatsııalyq, hımııalyq, bıologııalyq barlaý avtomobılin qysqy tájirıbelik áskerı paıdalanýdyń ekinshi deńgeıi júrgizilýde.
Synaqtar tájirıbelik áskerı paıdalaný baǵdarlamasyna sáıkes júrgiziledi.
Brondalǵan dońǵalaqty mashınalarǵa tájirıbelik áskerı synaqtar júrgizý boıynsha vedomstvoaralyq ózara is-qımyl sheńberinde Qorǵanys mınıstrliginiń, Ónerkásip jáne qurylys mınıstrliginiń, UQK Shekara qyzmetiniń, ІІM Ulttyq ulanynyń mamandary, sondaı-aq «Qazaqstan Paramaýnt Injınırıng» JShS ınjenerlik-tehnıkalyq quramy tartyldy.
«Synaq barysynda ótýi qıyn jerlerde tereń qar jamylǵysyn eńsere otyryp, tómen temperatýra jaǵdaıynda bazalyq shassı synalyp, júrgizilip jattyqtyryldy. Agregattar men júıelerdiń jumys qabilettiligi, paıdalaný-tehnıkalyq qasıetteri, tehnıka agregattarynyń júkteme, jylý jáne jyldamdyq rejımderi tekserildi», — dep jazdy Tótenshe jaǵdaılar mınıstrliginen.
Esterińizge sala ketsek, «Qazaqstan Paramaýnt Injınırıng» JShS qazaqstandyq qorǵanys kásiporny TJM tehnıkalyq tapsyrmasy boıynsha ázirlegen arnaıy «Alan-2» radıatsııalyq, hımııalyq, bıologııalyq barlaý mashınalary Qaraǵandy jáne Almaty oblystarynda ornalasqan TJM áskerı bólimderine berildi.
Bıyl taǵy eki arnaıy mashına eldiń batysy men shyǵysyndaǵy TJM áskerı bólimderi tehnıkasynyń parkin tolyqtyrady.