Qutqarýshylar Aqmola oblysyndaǵy aýyl turǵyndary úshin ótkel uıymdastyrdy
KÓKShETAÝ. KAZINFORM – Aqmola oblysynyń Zerendi aýdanyndaǵy 16 turǵyndy úıine qaıyqpen jetkizýge týra keldi. Buǵan Shaǵalaly ózenindegi ponton kópir arqyly sýdyń tasyp ótýi sebep bolǵan, dep habarlaıdy Kazinform agenttiginiń tilshisi.
Aqmola oblystyq tótenshe jaǵdaılar departamenti baspasóz qyzmetiniń málimetine súıensek, sý deńgeıiniń kúrt kóterilýi saldarynan Shaǵalaly ózenindegi ponton kópirdi sý basqan.
– Bul ponton kópir Shaǵalaly aýylynyń negizgi bóligin onyń Nurly kóshesimen baılanystyrady. Atalǵan kóshede 28 úı ornalasqan. Ponton kópir arqyly sý tasyp ketti, alaıda kólik qatynasy tolyq úzilgen joq, balama jol bar. Degenmen jergilikti turǵyndar men jergilikti atqarýshy organdardyń ótinishi boıynsha qutqarýshylar jedel túrde ótkel uıymdastyryp, 16 adamdy qaıyqpen úıine jetkizdi. Sondaı-aq olarǵa azyq-túlik satyp alýǵa múmkindik jasady, – dedi óńirlik tótenshe jaǵdaılar departamentiniń resmı ókili Ersaıyn Qoıshybaev.
Sonymen qatar jergilikti atqarýshy organdar arnaıy tehnıkanyń kómegimen muz keptelisin joıyp, kópirdiń zaqymdanýyna jol bermedi.
Qazirgi ýaqytta sý tasqan aýmaqta jergilikti atqarýshy organ ókilderi, tótenshe jaǵdaılar qyzmeti men polıtsııa qyzmetkerleri kezekshilik uıymdastyrǵan.
Eske salaıyq, buǵan deıin TJM sý tasqynyna baılanysty jaǵdaıdy pysyqtap, qaı óńirlerge sý basý qaýpi tónip turǵanyn zerdeledi.
