Qutqarýshylar 9 myńnan astam adamdy qaýipsiz jerge kóshirdi - Syrym Sháriphanov

Bıyl 8 aıda órt jáne basqa da qaıǵyly oqıǵalar saldarynan 1,2 myń adam zardap shekti. Bul týraly Tótenshe jaǵdaılar mınıstri Syrym Sháriphanov aıtty, dep habarlaıdy QazAqparat tilshisi.

«Bıylǵy segiz aıda elimiz boıynsha 8 myńnan astam tótenshe jaǵdaı men basqa da oqıǵalar tirkelip, 1 250 adam zardap shekti, onyń ishinde 495 adam qaıtys boldy. Materıaldyq shyǵyn 9 mlrd 170 mln teńgeni qurady», - dedi S. Sháriphanov Májilistiń Ekologııa jáne tabıǵatty paıdalaný máseleleri jónindegi komıtetiniń keńeıtilgen otyrysynda azamattyq qorǵaý taqyrybyn talqalaý kezinde.

Onyń aıtýynsha, arnaýly bólimsheler 9 myńǵa jýyq adamdy qutqardy. Bul rette 9 myńnan astam adam qaýipsiz jerge evakýatsııalandy. Zardap shekken 3,5 myńnan astam adamǵa alǵashqy medıtsınalyq kómek kórsetildi.

«Sonymen qatar, tótenshe jaǵdaıǵa qatysty is-qımyl boıynsha birqatar júıelik problema bar. Ony Abaı, Qostanaı, Shyǵys Qazaqstan oblystaryndaǵy órtter, ArselorMıttal shahtalarynda bolǵan qaıǵyly oqıǵalar kezinde oryn alǵan faktiler rastap tur. Qazirgi kezde mınıstrliktiń barlyq áleýeti osy máselelerdi sheshýge baǵyttalǵan. Atap aıtqanda, Qaýipsizdik Keńesimen, Úkimet apparatymen jáne basqa da múddeli memlekettik organdarmen birlesip órtke den qoıý algorıtmi ázirlendi. Úkimet qaýlysymen Jahandyq jáne óńirlik aýqymdaǵy tótenshe jaǵdaıdy joıý jónindegi is-qımyl jospary bekitildi», - dedi mınıstr.