Qutqarý kókirekshesi balany ajaldan alyp qala almaıdy
PETROPAVL. QazAqparat - Balalardy sýda shomylý kezinde aman alyp qalý amaldarymen jáne qutqarý kókirekshesiniń qaýpi jóninde QazAqparat tilshisine SQO Tótenshe jaǵdaılar departamentiniń súńgýirlik-qutqarý bólimshesiniń basshysy Sergeı Cherkasov baıandady.
Bıyl respýblıka boıynsha 50 bala sýǵa ketken. 17 jyldyq tájirıbesi bar soltústikqazaqstandyq qutqarýshy Sergeı Cherkasovtyń aıtýynsha, balalardy sýda ata-ana qaraýynsyz qaldyrý - arty qaıǵyǵa ákep jatatyn eń úlken qatelik. Saldarynan balalar sýǵa aǵyp ketip jatady. Ondaı jaǵdaıda balany qutqarý kókirekshesi de aman alyp qala almaıdy. Ol kez kelgen ýaqytta jarylyp ketýi múmkin.
Qutqarýshylar udaıy kúzetip júretin qalalyq jaǵajaılardyń ózinde balaly adamdardyń sýdan 10-15 metr qashyqtyqta júrgeni abzal. Mundaı jaǵdaıda balanyń sýǵa qaraı júgirip bara jatqan sátin birden baıqaýǵa bolady.
«Qatty qoryqqannan balalar kómek surap, belgi de bermeıdi. Kómekke shaqyrýdyń ornyna sýǵa batyp kete beredi», - deıdi qutqarýshy.
Cherkasovtyń aıtýynsha, qaıǵyly oqıǵalardyń basym kópshiligi shomylýǵa tyıym salynǵan jerlerde bolyp jatady. Petropavldaǵy Esil ózeni aýmaǵynyń ózinde dál osyndaı 34 oryn bar.
Sondaı-aq, qaýip tóndirýshi aımaqqa sý ıirimderin jatqyzýǵa bolady. Túbi shuńqyr jerlerdegi sýdyń aǵyny kúsheıip, aınala bastaıdy. Júzip kele jatqan adam ony sýdyń betinen baıqamaıdy. Tájirıbeli júzgishtiń ózi shuńqyrǵa túskennen keıin batyp ketýi múmkin.
