Kútim balyǵy Qazaqstannyń Qyzyl kitabynan shyǵarylady
ASTANA. QazAqparat - Kútim balyǵy Qazaqstan Respýblıkasynyń Qyzyl kitabynan shyǵarylady. Bul jaıynda QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat.
Onyń atap ótýinshe, QR AShM Orman sharýashylyǵy jáne janýarlar álemi komıtetinde Qazaqstan Respýblıkasynyń qyzyl kitabynan kútim balyǵyn shyǵarý múmkinshiligi máseleleri jónindegi vedomstvoaralyq zoologııalyq komıssııanyń birinshi otyrysy ótken. Komıssııa músheleri «Balyq sharýashylyǵy qazaq ǵylymı-zertteý ınstıtýty» JShS Atyraý fılıalynyń dırektory E. Kádimovtiń 2006-2017 jyldary aralyǵyndaǵy kútim balyǵynyń taralýy men sanyn zerdeleý jónindegi ǵylymı-zertteý jumystarynyń nátıjeleri jaıyndaǵy baıandamasyn tyńdaǵan.
«Balyq sharýashylyǵy ǴZI» JShS Atyraý fılaly qyzmetkerleri júzege asyrǵan ǵylymı zertteýler, sonymen qatar sońǵy 5 jyl boıy balyqty aýmen aýlaý saraptamalary Mańǵystaý oblysyna qarasty Kaspıı teńiziniń kásipshilik ýchaskelerinde kútim balyǵynyń sanynyń qalpyna kelgendigi týraly málimetterdi naqtylady», - dep jazady ol.
Sáken Dildahmettiń atap ótýinshe, komıssııa músheleri ınstıtýt usynǵan zertteý nátıjelerin talqylaı kele, kútim balyǵynyń sany qalpyna keldi degen qorytyndyǵa kelgen. Bul Qazaqstan Respýblıkasy Úkimetiniń 2006 jylǵy 31 qazandaǵy N 1034 «Ósimdikter men janýarlardyń sırek kezdesetin jáne quryp ketý qaýpi tóngen túrleriniń tizbesin bekitý týraly» qaýlysynan kútim balyǵyn shyǵarý jumystaryn bastaýǵa jáne kútim balyǵyn QR Qyzyl kitabynan ІІІ sanattan (sırek kezdesetin) V (qalpyna kelgen) sanatyna aýystyrý máselesin qarastyrýǵa múmkindik beredi.
