«Kút jáne umytpa» - SQO-da soǵysqa attanǵan jigittiń tasqa jazǵan haty saqtalǵan
PETROPAVL. KAZINFORM – Soltústik Qazaqstan oblysynda maıdanǵa attanǵan jigittiń súıiktisine arnap tasqa qashap jazǵan haty saqtaýly.
Kúnniń kózinde, jeldiń ótinde jetpis jyldan astam ýaqyt jatqan bul tasty jergilikti turǵyn, «Konstantınovka-2004» JShS bas ınjeneri Vıtalıı Novgorodtsev oıda-joqta tapqan eken.
- Konstantınovka eldi mekeni Babyq-burlyq ózeniniń sol jaq jaǵasynda ornalasqan. 1936 jyly onyń oń jaǵalaýynda memleketke qaraıtyn dıirmen salyndy. Kóp uzamaı birneshe úı turǵyzylǵan. Ózennen ótetin jalǵyz aıaq ótkel bar. Men bul tasty osy joldyń boıynda baıqap qaldym. Anyqtap qarasam, qashalyp jazylǵan jazý bar eken, - deıdi Vıtalıı Novgorodtsev.
Erekshe tastyń ústine juldyz salynǵan. Qasynda «13 oktıabr, 1941» degen jazýy bar. Odan tómen «Jdı ı pomnı menıa» dep jáne aty-jóniniń bas áripteri jazylǵan.
Jádiger birneshe jyl jergilikti mekteptiń mýzeıinde saqtalǵan.
- Ólkemizdiń tarıhynan syr sherter, qundy jádigerler saqtalǵan mýzeıimiz bar. Bul tas osy mýzeıde turdy. Oqýshylarmen birge ony zerttep, kimniń jazyp qaldyrǵanyn anyqtamaq boldyq. Nátıjesinde eldi mekennen soǵysqa ketken birneshe adamnyń esimi sáıkes keldi. Keıin bul tasty ózimizdegi Jeńis saıabaǵyna aparyp qoıý týraly sheshim shyqty, - deıdi Konstantınovka orta mektebiniń dırektory Vasılıı Mantarıdı.
Osy tastyń negizinde Konstantınovka eldi mekeninde eskertkish paıda boldy. Ol soǵysqa barǵan barlyq adamnyń qurmetine arnaldy. Eskertkishti jergilikti sheber Aleksandr Antonov turǵyzdy.
- Bul oqıǵa eshkimdi beıjaı qaldyrmaıdy. Tasqa jazǵan adamnyń oqıǵasyn bilý qyzyq, biraq eldi mekende búgin kópti kórgender qalmaǵan.
Eskertkishte jaryn kútken áıeldi jáne tyrnalardy beıneledim, - deıdi Aleksandr Antonov.
Esterińizge salaıyq, SQO-da úsh maıdanger ǵana qalǵan. Solardyń biri – Vasılıı Makıenko jýyrda 99 jasqa toldy.