Qustardy sýretke túsirgendi unatamyn – atyraýlyq áýesqoı fotograf
ATYRAÝ. KAZINFORM – Atyraýlyq Fılıpp Tsıplenkovtyń mamandyǵy fotograf emes. Ol munaı tasymaldaıtyn kompanııa jumys isteıdi. Biraq tabıǵattyń ásem kórinisterin, ásirese qustardy sýretke túsirýdi unatady.
– Qustardy sýretke túsirýge áýestik neden bastaldy?
– Birneshe jyl buryn jergilikti tabıǵat janashyry ıÝlııa Vahmıstrova ótkizgen ekskýrsııaǵa qatysqan edim. Sol kezde Atyraýdyń tabıǵaty ásem ekenine kóz jetkizdim. Buryn oǵan mán bermeı júrdim. Ádette kún saıyn torǵaıdy, kógershin men qarǵany jıi kóremiz ǵoı. Biraq odan ózge de qustardyń bar ekenin eskere bermeımiz. Al ózge qustar qaladaǵy bıik úılerdiń aldynda júrmeıdi. Qos qanattylardy kórý úshin tabıǵat aıasyna jıi shyǵatyn boldym.
Ásirese Jaıyq ózeniniń jaǵalaýyna jıi baryp júrmin. Óıtkeni sý aıdynynyń jaǵalaýy san alýan qustyń bazaryna aınalady. Aqqý da, qoqıqaz ben aqqutan da keledi. Bul meniń qyzyǵýshylyǵymdy oıatty.
– Tabıǵattyń ásem kórinisin sýretke túsirip júrsiz be?
– Ár adamnyń unatatyn nársesi bar ǵoı. Bireýlerge tabıǵat aıasynda serýendegendi unaýy múmkin. Keıbireýler balyq aýlaǵandy qalaıdy. Al men qustardy sýretke túsirgendi unatamyn. Óıtkeni qustardyń ózindik álemi, minezi bar. Qustar da – tirshilik ıesi. Tabıǵattyń qustarsyz sáni bolmaıdy ǵoı. Qustardy túsirý arqyly Atyraý tabıǵatynyń ásem ekenin kórsetip júrmin.
– Áýesqoı fotografqa qustardy sýretke túsirý qandaı qıyn emes pe?
– Ádetke adamnyń áreketi bolsyn, nemese tabıǵat kórinisin sýretke túsirý ońaı emes. Onyń ústine men – áýesqoı fotograffyn. Sýretke túsirý – meniń hobbıim. Al qustardy sýretke tartý úshin úsh qaǵıdany berik ustanǵan jón. Bul – saqtyq, shydamdylyq, jedeldik. Saqtyq deıtin sebebim, qustardy úrkitip almaý qajet. Sál sybdyrdy estise, ushyp ketýi múmkin.
Fotoapparatymdy daıyndap, ońtaıly sátti kútýge týra keledi. Ońtaıly sátti kútý birneshe mınýtqa sozylady. Keıde ornymnan qozǵalmaı, saǵattap otyramyn. Qustardyń ár qımylyn qyzyqtaımyn. Qanattylardyń da ártúrli minezi bar. Biri bir ornynda uzaq turmaı, únemi ushyp júredi. Al endi bireýi ornynan qozǵalmaı, demalǵandaı bolyp otyrady. Sondaı kezde shydamdy bolýǵa tyrysamyn. Qanatyn qomdaǵan, túrli jándikti tistegen sátin túsirý úshin jedeldik kerek.
– Sýretke túsirýge shyqpas buryn jospar qurasyz ba?
– Naqty jospar quramyn deı almaımyn. Biraq tabıǵat aıasyna shyǵar aldynda tyńǵylyqty daıyndalamyn. Eń bastysy – áleýmettik jelidegi dostaryma ádemi sýret usyný. Onyń sany qansha bolǵanyn bilmeımin. Alaıda sýretterdi áleýmettik jelige jazylýshylar qataryn arttyrý úshin emes, tabıǵatqa súıispenshilikti arttyrý maqsatynda júkteımin.
– Ańdardy túsirip kórmedińiz be, álde kezdespeı júr me?
– Qustardy ǵana túsirýmen shektelgim kelmeıdi. Aldaǵy ýaqytta túlki, qasqyr sekildi ańdardy túsirýdi oılastyryp júrmin. Osyndaı dala ańdary kúshikterimen kezdesse, tipti jaqsy bolar edi. Biraq dalaǵa shyǵýdyń reti bolmaı júr.
– Ózińiz túsirgen sýretterdi kórmelerge usynyp kórmedińiz be?
– Qustardyń sýretinen kúntizbe jasaıtyn shyǵarmyn. Al kórmelerge, ne baıqaýlarǵa usyný týraly oılaǵan joq edim. Mundaı is-sharalarǵa qatysý úshin tájirıbe jınaý, sýretke túsirý sheberligimdi shyńdaý qajet. Bálkim, oǵan áli erteleý shyǵar. Alaıda bolashaqta kórmelerge usynýǵa bolatyn shyǵar.
Eske sala ketelik, budan buryn Qazaqstanda neshe qyzǵylt qoqıqaz bar ekeni jazylǵan.