Qustar kóbeıip keledi - AShM kóktemgi ańshylyqqa tyıym salýdyń paıdasy jaıly
Qustardyń azaıýyna baılanysty 16 aqpannan 14 maýsymǵa deıin kóktemgi ańshylyqqa tyıym salynǵanyn, kásipshilik ań aýlaýdan basqa, bir ańshyǵa shaqqanda jabaıy qus pen terisi baǵaly ańnyń táýliktik normasyna shekteý qoıylǵanyn habarlaǵan bolatynbyz.
Búgin AShM-da ótken baspasóz máslıhatynda Orman sharýashylyǵy jáne janýarlar dúnıesi komıtetiniń tóraǵasy Qaıyr Ryskeldınov kóktemgi ań aýlaý kez kelgen alańdaýshylyqty týǵyzyp, uıa salý naýqanyn kúrt buzatynyn aıtady. Bul rette eń aldymen belsendi ári reprodýktıvtik jaǵynan baǵaly atalyqtar atyp alynyp, bul óz kezeginde túrlerdiń gendik qoryn nasharlatady.
«Kóktemgi ańshylyqqa tyıym salýǵa baılanysty oblystyq orman sharýashylyǵy jáne janýarlar dúnıesi aýmaqtyq ınspektsııa basshylaryna kóktemde qustar sany boıynsha monıtorıng júrgizýge tapsyrma berildi. Kóktemgi ańshylyqqa tyıym salý qustar sanynyń ósýine oń áserin tıgizip otyr», - deıdi ol.
Qaıyr Ryskeldınov sońǵy úsh jyldyń ishinde úırekterdiń sany 10 paıyzǵa, qasqaldaq 5 paıyzǵa jáne qaz sany 13 paıyzǵa óskenin aıtady. Inspektorlardyń baqylaýy boıynsha jergilikti úırekterdiń tolyq uıa salýy anyqtalyp, súńgigish jáne batpaqty úırekterdiń ekinshi ret uıa salýy baıqalǵan. Sý aıdyndarynda sırek kezdesetin qyzyl bas qara úırek, jalpaqtumsyq úırek, saryaıdar úırek pen sur úırekter top-top bolyp júretin boldy.
«Tyıym salynǵan ańshylyq tártipti buzý boıynsha Qazaqstan Respýblıkasynyń Ákimshilik quqyq buzýshylyq týraly kodeksiniń 382-baby «Janýarlar dúnıesin paıdalaný talaptaryn jáne ań aýlaý qaǵıdalaryn buzý» boıynsha ákimshilik aıyppul salynyp ne ákimshilik quqyq buzýshylyq zattaryn, quralyn tárkileý kózdelgen», - deıdi Qaıyr Ryskeldınov.