Qusnı Qorlan áni baǵymdy ashty – Halyqaralyq baıqaý jeńimpazy Beksultan Kenshiqalıev
ALMATY. QazAqparat - T. Júrgenov atyndaǵy Qazaq ulttyq óner akademııasynyń stýdenti Beksultan Kenishqalıev Lıtva elinde ótken eki birdeı halyqaralyq baıqaýdyń bas júldesin enshiledi. Ónerimen álemdi moıyndatyp kelgen stýdentti, búgin akademııa rektory Ashat Maemırovtiń ózi qarsy aldy, dep habarlaıdy QazAqparat tilshisi.
T. Júrgenov atyndaǵy Qazaq ulttyq óner akademııasynyń stýdenti Beksultan Kenishqalıev halyqaralyq baıqaýǵa birinshi ret qatysty. Álemdik deńgeıdegi óner dodasynda onyń baǵy janyp, bir emes eki birdeı Gran-prıdi ıelendi.
Eki baıqaý da Lıtva memleketinde ótti. Birinshisi - «Palanga-2019» XV-shi halyqaralyq ánshiler baıqaýy. Ekinshisi - «The Voices Lithuania» álemdik televızııalyq baıqaý.
«Maǵan Lıtva elinde ótken eki birdeı baıqaýǵa qatysý buıyrypty.Árıne, qorqynysh pen qobaljý boldy. Sebebi, onda tek myqtylar baq synasty. Ózim bilim alyp jatqan oqý orny men elmizdiń namysyn bermeýge tyrystym. Barymdy saldym dese de bolady. Basty maqsatym - jeńý boldy. Soǵan qol jetkizdim, qýanyshymda shek joq. «Palanga-2019» baıqaýynda Estaıdyń áni - Qusnı Qorlandy oryndadym. Dál osy shyǵarma meniń baǵymdy ashty»,- deıdi Beksultan Kenishqalıev.
«The Voices Lithuania» álemdik televızııalyq baıqaýyna 24 memleketten úmitkerler qatysty. Beksultan Kenishqalıev bul óner dodasynda
Elton Djonyń «Sory seems to be»- ániniń naqyshyna keltirip oryndap, eń joǵary upaı sanymen bas júldege ıe boldy.
«Televızııalyq baıqaýdyń shartyna sáıkes, biz ánimizdi quramynda 75 adamy bar sımfonııalyq orkestrdiń súıemeldeýimen oryndadyq. Munda da biraz ter tóktim.Barlyq týǵan-týystarym men qazaqstandyqtardyń qoldaýyn sezdim. Jeńimpazdardy anyqtap, sahna tórine shaqyryp jatqanda júregim dúrsildep qoıa berdi. Bir kezde anandaı jerden Qazaqstannyń týyn kórdim. Sonda kózime eriksiz jas keldi. Bul endi qýanyshttyń jasy. Eń aldymen anama habarlasyp, bas júldeni jeńip alǵanymdy aıttym»,-deıdi jeńimpaz.
Qos birdeı bas júldeni jeńip kelgen daryndy stýdentti T.Júrgenov atyndaǵy Qazaq ulttyq óner akademııasynyń rektory qarsy alyp kuttyqtady.
«Bizdiń akademııa úshin bul úlken jetistik. Beksultan balamyz Lıtva memleketinde Qazaqstannyń namysyn qorǵady. Úmitimizdi aqtady. Jas talanttardy qoldaý, el ónerin halyqaralyq arenada dáripteý - bizdiń elimizdiń mádenı saıasatyndaǵy basty baǵyttardyń biri.Negizi eýropalyqtar qazaqtyń án ónerine tánti. Sebebi, bizdiń daryndy jastarymyz ámbebap. Olar qazaqstandyq óner ıeleriniń boıyndaǵy erekshelikterge tańqalady. Ol ras,bizdiń talantty jastarymyzdyń óneri saf altyndaı taza. Tabıǵı shynaıylyq bar. Tek sony ary qaraı damytyp, jetildirip otyrý kerek»,-dedi Ashat Maemırov.
Baıqaýǵa Qazaqstanmen birge, Reseı, Izraıl, Latvııa, Ázerbaıjan, Lıtva, Belarýs, Armenııa sekildi memleketterdiń estrada oryndaýshylary qatysqany týraly aıtqan bolatynbyz.
