Qusmuryn temirjol vokzaly qaıta ashyldy
QOSTANAI. KAZINFORM – Qostanaı oblysy Áýlıekól aýdanynyń Qusmuryn stantsııasynyń temirjol vokzaly kúrdeli jóndeýden keıin paıdalanýǵa berildi.
Saltanatty sharaǵa aımaq basshysy Qumar Aqsaqalov qatysty.
Memleket Basshysynyń tapsyrmasyna sáıkes elimizde temirjol vokzaldaryn aýqymdy jańǵyrtý jumystary júzege asyrylýda.
Búgin Áýlıekól aýdany Qusmuryn stantsııasynyń temirjol vokzaly kúrdeli jóndeýden keıin qaıta ashyldy.
Elimiz boıynsha 124, Qostanaı oblysynda Qostanaı, Arqalyq, Tobyl Jelezorýdnyı, Amanqaraǵaı jáne Qusmuryn stantsııalaryndaǵy 6 temirjol vokzaly qaıta jańartylýda.
— Buǵan deıin Amanqaraǵaı stantsııasynyń jańartylǵan temirjol vokzaly paıdalanýǵa berilgen bolatyn. Qusmuryn vokzaly 1949 jyly salynǵan. Qaıta jóndeý barysynda ǵımarattyń sáýlettik kelbeti tolyq jańartylyp, ınjenerlik jeliler aýystyryldy. Kútý zaldary, bılet kassalary men sanıtarlyq toraptar zamanaýı standarttarǵa sáıkes jabdyqtaldy, — dedi Qostanaı oblysynyń ákimi Qumar Aqsaqalov.
Vokzaldyń jalpy aýmaǵy 893 sharshy metrden 944 sharshy metrge deıin ulǵaıdy.
Ortalyq platforma 430 metrden 462 metrge, al jıektegi platforma 491 metrden 540 metrge deıin uzartyldy.
Buryn stantsııa 17 vagonǵa deıingi jolaýshylar poıyzdaryn qabyldaı alsa, endi 21 vagonǵa deıingi poıyzdardy qabyldaýǵa múmkindik bar.
Aıta ketelik elimizdiń úsh óńirinde jańartylǵan bes temirjol vokzaly ashylǵan edi.
