Qus sharýashylyǵy kásiporyndary tarapynan astyqqa degen suranys artty
ASTANA. KAZINFORM - Azyq-túlik kelisimshart korporatsııasy qus sharýashylyǵy kásiporyndary tarapynan astyqqa joǵary suranystyń artqanyn tirkedi.
QR aýyl sharýashylyǵy mınıstrligi baspasóz qyzmetiniń habarlaýynsha, ulttyq astyq operatorynyń atyna iri qus fabrıkalarynan shamamen 200 myń tonna astyq satyp alýǵa ótinimder kelip túsken.
Іshki naryqty qamtamasyz etý jáne óńdeýshi sektordyń qajettilikterin qanaǵattandyrý maqsatynda Azyq-túlik kelisimshart korporatsııasy astyq pen maıly daqyldardy elektrondyq bırjalyq saýda tetigi arqyly ótkizip jatyr. 2026 jylǵy naýryz aıynyń basynan beri un tartý kásiporyndaryna 14,9 myń tonna azyq-túliktik bıdaı jóneltildi.
Satylym qurylymynda negizgi úlesti un óndirý úshin suranysqa ıe, kleıkovınasy 23%-dan joǵary úshinshi synypty bıdaı qurady.
Bıdaıdyń baǵasy sapalyq sıpattamalaryna qaraı:
• kleıkovınasy 23–24% – tonnasyna 104 myń teńge;
• kleıkovınasy 25–26% – tonnasyna 109 myń teńge;
• kleıkovınasy 27–28% – tonnasyna 125 myń teńge.
Buǵan deıin ulttyq astyq operatory astyq pen maıly daqyldardyń erkin qaldyqtaryn satýdyń bastalǵany týraly habarlaǵan bolatyn. Bul rette 4–5 synypty bıdaı tek qus jáne mal sharýashylyǵy kásiporyndarynyń qajettilikteri úshin ǵana ótkiziledi, bul atalǵan salalardy nysanaly túrde qoldaýǵa múmkindik beredi.
-Bırjalyq alańdy paıdalaný saýda-sattyqtyń ashyqtyǵy men básekelestigin qamtamasyz etedi. Azyq-túlik kelisimshart korporatsııasy azyq-túlik qaýipsizdigin qamtamasyz etý jáne ishki naryqty astyqpen turaqty qamtamasyz etý baǵytyndaǵy jumysyn jalǵastyryp jatyr,-delingen habarlamada.
Bırjadaǵy saýda sessııalary jumys kúnderi kún saıyn saǵat 10:00-den 17:00-ge deıin ótedi. Saýda-sattyqqa barlyq múddeli qatysýshylar qatysa alady.
Osyǵan deıin elimizde astyq pen un eksporty 8,9 mln tonnaǵa jetkeni týraly jazdyq.
