Kúshtik qurylymdar birinshiligi: 200-den asa balýan chempıondyq ataqqa talasady

Saıystyń ashylýyna qorǵanys mınıstri avıatsııa general-leıtenanty Dáýren Qosanov qatysty. Qorǵanys vedomstvosynyń basshysy sportshylardy, jattyqtyrýshylardy, tóreshiler men kórermenderdi quttyqtap, mundaı jarystardyń áskerı qyzmetshilerdiń kásibı daıarlyǵyn arttyrýdaǵy jáne vedomstvoaralyq ózara is-qımyldy nyǵaıtýdaǵy mańyzyn atap ótti.

– Boz kilem ústindegi tartys naǵyz úzdikterdi anyqtap qana qoımaı, bólimshelerdiń kásibıligin arttyrýǵa yqpal etedi. Іrikteý kezeńderine úsh myńnan astam balýan qatysty. Týrnır ulttyq sport túrlerin nasıhattaýda, jaýyngerlik rýhty kóterýde jáne kúshtik qurylymdar arasyndaǵy ózara is-qımyldy nyǵaıtýda mańyzdy ról atqarady, - dedi Dáýren Qosanov.

Chempıonatqa Qorǵanys mınıstrligi, Іshki ister mınıstrligi, Tótenshe jaǵdaılar mınıstrligi, Memlekettik kúzet qyzmeti, Shekara qyzmeti, Ulttyq qaýipsizdik komıteti jáne Ulttyq ulan atynan 30 komanda quramynda 200-diń ústinde sportshy qatysyp otyr.

Sambo saıysynda 58, 64, 71, 79, 88, 98 jáne 98 keliden joǵary salmaqta, al qazaq kúresi 55, 60, 66, 74, 82, 90, 100 jáne 100 keliden joǵary salmaq boıynsha ótýde.

Qorǵanys mınıstrligi Sport komıtetiniń tóraǵasy, polkovnık Arman Ábeýovtyń aıtýynsha, tatamıdegi saıystyń qorytyndysy boıynsha Qazaqstannyń kúshtik qurylymdarynyń qurama komandalary jasaqtalady. Olar Áskerı sporttyń halyqaralyq keńesi (CISM) aıasynda ótetin sambo men qazaq kúresinen álem chempıonattarynda, sondaı-aq Ózbekstanda ótetin kýrash kúresinen CISM-niń alǵashqy álemdik jarysynda el namysyn qorǵaıdy.

Týrnır áskerı-qoldanbaly sportty damytýǵa, áskerı qyzmetshilerdiń dene daıyndyǵyn nyǵaıtýǵa jáne ulttyq kúres túrlerin halyqaralyq deńgeıde ilgeriletýge baǵyttalǵan.

Budan buryn Qazaqstannyń kúshtik qurylymdary arasynda qazaq kúresi men sambodan ashyq chempıonat ótetinin jazǵanbyz.