Kúshtik qurylym qyzmetkerleri Almatyda elıtalyq páterlerdi alǵan joq — ІІM

ALMATY. KAZINFORM — Іshki ister mınıstrligi «Esentai City» turǵyn úı keshenindegi qymbat páterlerdiń kúshtik qurylym qyzmetkerlerine berilgeni týraly aqparatqa túsinikteme berdi.

Jelide Almatydaǵy elıtalyq páterler kúshtik qurylymdarǵa óteýsiz negizde beriledi degen aqparat taraǵan bolatyn. Ondaǵy málimetke sáıkes, jyljymaıtyn múlik QR Qarjy mınıstrligi Memlekettik múlik jáne jekeshelendirý komıtetiniń Almaty qalasy boıynsha departamentiniń teńgeriminde bolǵan jáne memlekettik aýktsıon saıtyna shyǵarylǵan. Jyljymaıtyn múliktiń jalpy quny 3,2 mlrd teńgege baǵalanǵan. 

QR Іshki ister mınıstrligi bul páterlerdi alý týraly aqparatty joqqa shyǵardy.

— Atalǵan jyljymaıtyn múlik nysandary QR Іshki ister mınıstrligine berilgen joq jáne ishki ister organdarynyń teńgeriminde turǵan joq. Sonymen qatar Qazaqstan Respýblıkasy ІІM-niń qurylymdyq bólimsheleri bul páterlerdi óz qaraýyna qabyldamaǵan, is júzinde paıdalanbaıdy jáne qyzmettik nemese ózge de maqsattar úshin paıdalanýdy josparlap otyrǵan joq, — dep habarlady ІІM baspasóz qyzmeti.

Mınıstrlik ishki ister organdary qymbat turǵyn úılerdi berý, paıdalaný jáne kútip ustaý máselelerimen aınalyspaıtynyn atap ótti.

— Bul suraqtar Qazaqstan Respýblıkasy Іshki ister organdarynyń quzyretine jatpaıdy, — delingen ІІM jaýabynda.

Eske salaıyq, Esentai City — Almaty qalasyndaǵy Esentaı ózeniniń boıynda, Ál-Farabı dańǵylynda ornalasqan premıým-klastaǵy turǵyn úı kesheni. Joba damyǵan ınfraqurylymy bar «qala ishindegi qala» retinde tanystyrylǵan bolatyn. Alaıda keıingi jyldary bul nysan qylmystyq tergeý men sot otyrystarynyń basty taqyrybyna aınaldy.

Buǵan deıin atalǵan turǵyn úı daýyna qatysy bar uıymdasqan qylmystyq top múshesi Eldos Qospaev pen onyń sybaılastary sottalǵanyn jazǵanbyz.