Kúshti alkogol ónimderin satýǵa tyıym salynatyn ýaqyt shekteýleri usynyldy
ASTANA. QazAqparat - Kúshti alkogol ónimderin satýǵa keshki saǵat 21-den kelesi kúngi saǵat 12-ge deıin tyıym salý usynylady. Bul týraly Parlament Májilisindegi etıl spırti men alkogol ónimderiniń óndirilýin jáne aınalymyn memlekettik retteýge arnalǵan zań jobasynyń tanystyrylymy barysynda málim boldy.
Qarjy vıtse-mınıstri Ardaq Teńgebaevtyń aıtýynsha, spırtti ishimdikterdi satýǵa ýaqyt boıynsha shekteý qoıý kóptegen elder tájirıbesinde bar. «Zertteýlerge súıensek, jurtshylyq arasynda alkogoldi tutyný deńgeıi dúkenderdiń jumys ýaqyty ulǵaıǵanda ósedi jáne jumys ýaqyty azaıǵanda tómendeıdi eken. Máselen, Shvetsııada senbi kúnderi araq dúkenderin jabý tájirıbesi engizilgeli beri osy eldegi maskúnemdikpen qamaýǵa alynatyndar sany 10%-ǵa tómendegen. Osyǵan uqsas nátıjeler Norvegııa men Fınlıandııa elderinen de baıqaldy», - deıdi vıtse-mınıstr.
«Budan basqa ishimdikke salynǵan keıbir adamdar «bas aýrýy sındromynan» qutylý maqsatynda tańerteń dúkende emin-erkin satylatyn ishimdikke ońaı qol jetkizedi. Sóıtip, ishimdikke salynǵan adam maskúnemdigin tejeýdiń ornyna, ary qaraı jalǵastyrady. Atalǵan ózgerister osyǵan baılanysty usynyldy», - deıdi Ardaq Teńgebaev.
Onyń aıtýynsha, ózgerister tek kúshtiligi 30 gradýstan joǵary spırtti ishimdikterdi satý ýaqytyn qysqartýǵa qatysty bolyp otyr. ıAǵnı, kúshtiligi 30 gradýstan tómen alkogol ishimdikterine tyıym salý burynǵysha túngi saǵat 23-ten tańerteńgi saǵat 8-ge deıin bolyp qala beredi. «Bul rette, atalǵan shekteýler jumys jáne demalys kúnderine qaraı bólinbeıdi. Sonymen qatar, meıramhanalarǵa, barlar men kafelerge qoldanylmaıdy», - deıdi vıtse-mınıstr.
