Kúshti jel: Qaraǵandy oblysynda 60-tan astam ǵımarattyń shatyry men qaptamalary zaqymdandy
Qaraǵandy oblysynda jarty táýlik ishinde qatty jel 60-tan astam ǵımarattyń shatyry men qaptamasyn zaqymdady. Qazirgi ýaqytta kóshelerdi tazalaý jáne elektr jelisin qalpyna keltirý jumystary júrip jatyr, dep habarlaıdy Kazinform agenttiginiń tilshisi.
Qaraǵandy oblysy Tótenshe jaǵdaılar departamentiniń derekteri boıynsha 18 qarasha saǵat 15:55-ten 19 qarasha saǵat 09:00-ge deıin jeldiń ekpini 61 ǵımarattyń tóbesi men qaptamasyn julyp alyp, qıratqan. Zardap shekkender joq.
Sondaı-aq, Qaraǵandyda elektr symdarynyń úzilýi tirkeldi. Nátıjesinde qalanyń bir bóligi jaryqsyz qaldy.
«Qalanyń kireberis bólikterindegi qulaǵan shatyrlar, aǵashtar, jaryqtandyrý tirekteri birden jınap tastaldy. Biz aýmaqty tazartý jumystaryn júrgizip jatyrmyz, aǵashtardy kesip tastaımyz, tirekterdi alyp tastaımyz, aıaldama pavılondaryn retke keltiremiz, bárin tez arada joıamyz. Elektr energııasyna keletin bolsaq. Qatty jeldiń saldarynan qala ishinara elektr qýatynsyz qaldy. Keshe qalanyń basym bóligin Gogol, Loboda, Nazarbaev, Erýbaev, Abaı, Sátbaev, Jambyl jáne t. b. kósheleri jaryqsyz qaldy. Osy ýaqytta elektr qýatynsyz otyrǵan shaǵyn aýdandar men kósheler: Vostok-5, Kógildir toǵandar, Shahterskıı sh/a, Motornaıa, Olımpııskaıa, Qazaqstan, Rynochnaıa, Armeıskaıa, Komýnalnaıa, Iterovskaıa, Iskry, Rýdnınskaıa, Ýspenskaıa, Drýjby, Sochınskaıa, Lokomotıvnaıa, Tretıakovka, Jeleznodorojnaıa, Pavlenko, Shaýmıana kósheleri. Qaraǵandy jaryq mamandary aqaý shyqqan jerlerde jumystar júrgizip jatyr. Jaǵdaıdy jeke baqylaýymda ustaımyn», - dedi Qaraǵandy ákimi Meıram Kojýhov.
Elektr energııasynyń ajyraýyna baılanysty Suryptaýda, Jumysshylar kentinde jáne Kompaneıskide sorǵy stantsııalary jumys istemedi. Daýyldan birneshe saǵat ótken soń, sorǵy stantsııalaryndaǵy aqaýlar joıyldy.
Sorǵy stantsııasynda kerneýdiń bolmaýyna baılanysty Vostok - 1,2,4 shaǵyn aýdandary jylýmen jabdyqtaýdyń tómengi rejımine aýystyryldy. Biraq qazirgi ýaqytta elektrmen jabdyqtaý qalypqa keltirilip, úılerge jylý tolyq kólemde berilip jatyr.
19 qarashada oblysta qar, tuman jáne kóktaıǵaq bolýy yqtımal. Osyǵan baılanysty Thtenshe jaǵdaılar departamenti oblystyń barlyq turǵyndaryna jel kúsheıgen kezde qaýipsizdik erejelerin qatań saqtaýdy jáne asa qajet bolmaǵan jaǵdaıda kóshege jáne eldi mekenderden tys jerlerge shyqpaý kerektigin eskertedi. TJD resmı paraqshasynda jáne buqaralyq aqparat quraldarynda aýa-raıynyń ózgerýin, oblys joldaryndaǵy qozǵalys jaıly habarlamalardy nazarǵa alý kerektigi aıtyldy.
