Kúshti parlament atqarýshy bıliktiń ústinen qajetti baqylaýdy qamtamasyz etedi — lord Maıkl Djerman
ASTANA. KAZINFORM — Qazaqstan demokratııalyq reformalar baǵytynda odan ári ilgerilep keledi. Mundaı pikirdi Kazinform-nyń Londondaǵy menshikti tilshisine bergen suhbatynda Ulybrıtanııa lordtar palatasynyń múshesi Maıkl Djerman málimdedi.
Brıtanııalyq saıasatkerdiń sózinshe, memleket Eýropa Keńesi Venetsııa komıssııasynyń usynystaryn júzege asyrýda aıtarlyqtaı jetistikterge jetken. Aıta keteıik, atalǵan uıym ulttyq zańnamanyń demokratııalyq standarttarǵa saı kelýin baǵalaıdy.
— Qazaqstan tolyqqandy demokratııalyq memleket qurý jolynda senimdi ilgerilep keledi. Respýblıka Venetsııa komıssııasynyń usynystaryn oryndaýda mańyzdy qadamdar jasady, — dedi Eýropa Keńesi Parlament assambleıasynyń Ulybrıtanııa atynan múshesi Maıkl Djerman.
Onyń aıtýynsha, konstıtýtsııalyq reforma bul úderistegi mańyzdy kezeń boldy. Ol parlament rólin jáne bılik tarmaqtary arasyndaǵy teńgerimdi kúsheıtedi.
— Konstıtýtsııalyq reforma da — mańyzdy qadam. Sonyń arqasynda parlament kúsheıedi. Al atqarýshy bılik quziretin baqylaýsyz jáne bekitýsiz qoldana almaıdy, — dedi sarapshy.
Lord Djermannyń pikirinshe, kelesi kezeń — zańnamalyq organnyń quziretin is júzinde júzege asyrý.
— Aldaǵy birneshe aıda parlament jańa quziretterin qalaı paıdalanatyny túsinikti bolady. Parlamenttiń komıtetteri qanshalyqty tıimdi jumys isteıtini jáne zań shyǵarý úderisinde parlament baqylaýy qalaı qurylatyny da mańyzdy másele, — dedi ol.
Sonymen qatar, reformalardyń sátti bolýy qabyldanǵan sheshimderge emes, olardyń is júzindegi nátıjelerine baılanysty.
— Tıimdi júzege asyrylsa, bul quziretter úkimettiń aldaǵy baǵytyn qalyptastyrýǵa yqpal etedi. Reformalar memleket múddesi úshin úkimet jumysyna qajetti baqylaýdy qamtamasyz etýge baǵyttalǵan. Parlament qyzmetiniń arqasynda shyn mánindegi ózgerister oryn alsa, reformalardyń jemisti bolǵanyn bildiredi, — dedi brıtanııalyq sarapshy.
Aıta keteıik, buǵan deıin konstıtýtsııalyq reforma Qazaqstannyń saıası jańarýyna jol ashatynyn jazǵanbyz.
