«Kúshti Konstıtýtsııa – kúshti memleket»: Atyraý oblysynyń ákimi aımaq jurtshylyǵymen kezdesti
ATYRAÝ. KAZINFORM – Atyraý oblysynyń ákimi Serik Shápkenov 2026 jylǵy 6 naýryzda óńir jurtshylyǵymen júzdesti. Talqylaýǵa elde júrgizilip jatqan konstıtýtsııalyq reforma jáne 2026 jylǵy 15 naýryzǵa josparlanǵan jalpyhalyqtyq referendým ózek boldy.
Aımaq basshysy kirispe sózinde Qazaqstan óziniń damý jolynda betburysty kezeńdi bastan ótkerip jatqanyn atap aıtty. Memleket basshysy Qasym-Jomart Toqaevtyń bastamasymen 130 adamnan turatyn Konstıtýtsııalyq komıssııa quryldy. Onyń quramyna zańgerlik qaýymdastyqtyń beldi ókilderi, ǵalymdar men qoǵam qaıratkerleri endi. Komıssııaǵa azamattardan tsıfrlyq platformalar arqyly 10 myńnan astam usynys kelip túsip, 12 otyrys ótkizilgen.
Usynystar men bastamalardy jan-jaqty zerdelegen komıssııa músheleri ortaq qorytyndyǵa keldi: jeke dara túzetýler jetkiliksiz, elge jańa Konstıtýtsııa qajet. 2026 jylǵy qańtarda qalyń jurtshylyqqa qujattyń alǵashqy jobasy tanystyryldy. Oǵan Prezıdenttiń «Adal azamat», «Zań men tártip» jáne «Taza Qazaqstan» bastamalary negiz boldy.
Jıyn barysynda spıkerler sóz sóılep, árqaısysy reformany óziniń kásibı jáne ómirlik tájirıbesine súıene saralady. Barlyq baıandamanyń ortaq túıini – adam memleket úshin emes, memleket adam úshin qyzmet etýi tıis. Bul — jańa Ata zań jobasyn aıqyndaıtyn basty qaǵıda. Spıkerler basty qujattyń mańyzdy jańalyqtaryna toqtaldy.
Jańa Konstıtýtsııanyń preambýlasynda alǵash ret joǵary quqyqtyq deńgeıde Uly dalanyń myńjyldyq tarıhynyń sabaqtastyǵy, tarıhı-mádenı murany saqtaý mindeti shegelenip, aǵa býynnyń el bolashaǵyn qalyptastyrýdaǵy erekshe róli moıyndalady. Jeke adamnyń qaýipsizdigi uǵymy aıtarlyqtaı keńeıedi: memleket azamattardy tsıfrlyq keńistikte qorǵaý jaýapkershiligin óz moınyna alady. Bul jeke derekterdiń qupııalylyǵyn saqtaý máselesin qamtıdy jáne jappaı tsıfrlandyrý dáýiriniń syn-qaterlerine jaýap bolyp sanalady. Zań ústemdigi, ádilettilik jáne tabıǵatty qorǵaý qaǵıdattary Konstıtýtsııalyq deńgeıde bekitiledi.
Іs-sharaǵa túrli salada qyzmet etetin 100-den astam adam qatysty. Olardyń qatarynda oblys ákimdigi basshylyǵy men ákim orynbasarlary, qala jáne aýdandyq máslıhat tóraǵalary, oblystyq jáne aýdandyq ardagerler keńesteriniń ókilderi, qoǵamdyq keńes tóraǵalary, ýnıversıtetterdiń professorlyq-oqytýshylyq quramy, mádenıet jáne teatr qaıratkerleri, oblystyq basqarma basshylary, oblystyq máslıhat depýtattary, joǵary oqý oryndarynyń rektorlary, dinı konfessııa ókilderi jáne buqaralyq aqparat quraldary salasynyń ardagerleri bar.
Oblys ákimi Ata zańǵa ekologııalyq qaýipsizdik, tabıǵı resýrstardy qorǵaý, tabıǵatty aıalaý týraly normalardyń engizilýi Atyraý oblysy turǵyndary úshin erekshe mańyzdy ekenin atap ótti.
Kezdesýdi qorytyndylaǵan oblys ákimi Serik Shápkenov jańa Konstıtýtsııany qabyldaý ýaqyt talaby ekenin aıtty. Al 15 naýryzda ótetin referendým árbir azamattyń memlekettiń quqyqtyq negizin qalyptastyrýǵa qatysýyna múmkindik beredi.
