Kúshti áser etetin psıhotroptyq preparattardy taratqan 21 adam ustaldy
ASTANA. KAZINFORM — Іshki ister mınıstrligi Aqmola jáne Qaraǵandy oblystarynda kúshti áser etetin preparattardy zańsyz taratýmen aınalysqan eki toptyń qyzmetin toqtatty. Operatsııa barysynda 21 adam ustalyp, 50 myńnan astam quty «Tropıkamed» tárkilendi. Bul týraly ІІM málim etti.
Mınıstrliktiń dereginshe, qazan aıynda elimizdiń birneshe óńirinde atalǵan preparattardy jetkizý arnalary anyqtalyp, olardy zańsyz ótkizý shemalarynyń joly kesilgen. Atap aıtqanda, Kókshetaý, Şýchınsk qalalary men «Býrabaı» kýrorttyq aımaǵynda preparattardy jetkizý men taratýdy jolǵa qoıǵan qylmystyq top múshelerin bir mezgilde ustaý operatsııasy júrgizildi. Barlyǵy 11 adam ustalǵan.
— Olardyń qatarynda farmatsevtıkalyq kompanııalardyń ıeleri men qyzmetkerleri, kýrerler jáne ózge de tulǵalar bar. Tintý is-sharalary barysynda «Tropıkamed» preparatynyń 50 myńnan astam qutysy jáne osyǵan uqsas basqa da preparattardyń shamamen 4 myń birligi tárkilendi, — delingen habarlamada.
Sonymen qatar atys qarýy, oq-dáriler, birneshe avtokólik jáne iri kólemdegi aqsha qarajaty, onyń ishinde shetel valıýtasy anyqtalyp, tárkilendi. Osyǵan uqsas is-sharalar Qaraǵandy jáne Temirtaý qalalarynda da júrgizildi. Nátıjesinde jergilikti qylmystyq orta ókilderi kirgen 10 adamnan turatyn top ustaldy.
Olardyń Qaraǵandy oblysynyń aýmaǵynda kúshti áser etetin psıhotroptyq preparattardy ótkizýge qatysy bar ekenin rastaıtyn dálelder jınaldy. Tintý barysynda psıhoaktıvti zattar, travmatıkalyq jáne sýyq qarý anyqtalyp, tárkilendi. Qazirgi ýaqytta sotqa deıingi tergep-tekserý júrgizilip jatyr.
— Mundaı qylmystar qoǵamǵa eleýli qaýip tóndirip, adamdardyń ómiri men densaýlyǵyna aýyr zardaptar ákelýi múmkin. Qabyldanǵan sharalardyń nátıjesinde kúshti áser etetin preparattardy zańsyz taratýdyń birneshe arnasynyń qyzmeti toqtatylyp, qaýipti ónimderdiń edáýir kólemi zańsyz aınalymnan alyndy jáne olardyń halyq arasynda odan ári taralýyna jol berilmedi. ІІM osyndaı qylmystardy anyqtaý jáne jolyn kesý, zańsyz shemalardy uıymdastyrýshylardy anyqtaý jáne olardy zańda belgilengen jaýaptylyqqa tartý boıynsha júıeli jumysty jalǵastyrady, — dedi ІІM uıymdasqan qylmysqa qarsy kúres departamentiniń ókili Qýandyq Alpys.
Aıta keteıik, buǵan deıin Kókshetaýda tyıym salynǵan dári-dármek taratqan kúdikti ustalǵan bolatyn.
