Kýshner men Netanıahý Gaza máselesi boıynsha eki jumys tobyn qurýǵa kelisti
ASTANA. KAZINFORM – AQSh prezıdentiniń keńesshisi Djared Kýshnerdiń Izraıl premer-mınıstri Bınıamın Netanıahý bastaǵan delegatsııamen kezdesýiniń qorytyndysy boıynsha Gaza máselesine qatysty eki jumys tobyn qurý týraly sheshim qabyldandy, dep habarlaıdy Anadoly.
Izraıl premer-mınıstriniń keńsesi taratqan málimdemege sáıkes, Netanıahý men Gaza jónindegi Beıbitshilik keńesi ókilderiniń kelissózderi «syndarly» jaǵdaıda ótken.
Taraptar eki jumys tobyn qurýǵa kelisti. Birinshi top Gazany qarýsyzdandyrý máselesimen aınalysady. Izraıl men Beıbitshilik keńesi bul úderisti barynsha tez júzege asyryp, Gaza sektoryn qalpyna keltirý jumystary bastalǵanǵa deıin qarýdy tapsyrýdy aıaqtaýdy kózdep otyr.
Ekinshi jumys toby sanıtarlyq jaǵdaı, taza sýmen qamtamasyz etý jáne Gaza turǵyndarynyń qoǵamdyq densaýlyǵyna qatysty basqa da máselelerdi qarastyrady.
Izraıldik buqaralyq aqparat quraldarynyń habarlaýynsha, kezdesýdiń negizgi maqsaty Gazadaǵy kelisimniń «ekinshi kezeńine ótý» úderisin ilgeriletý bolǵan. Alaıda Djared Kýshner men Bınıamın Netanıahý delegatsııalary kóptegen máseleler boıynsha ortaq kelisimge kele almaǵan.
Izraıldiń memlekettik telearnasy KAN málimetinshe, Kýshner men Netanıahý arasyndaǵy kezdesý tórt saǵatqa sozylǵan.
Taraptar Gaza boıynsha kelisimdi ilgeriletýge qatysty birqatar máselede ýaǵdalasqan. Al HAMAS-ty qarýsyzdandyrý máselesinde uıym qarýyn palestınalyq tehnokrattardan quralǵan Gazany basqarý jónindegi ulttyq komıtetke emes, amerıkalyq qolbasshy Djasper Djeffers basqaratyn Halyqaralyq turaqtandyrý kúshterine tapsyrady dep sheshilgen.
Sonymen qatar kóptegen máselede kelisimge qol jetkizilmegen.
Buǵan deıin jeksenbi kúni ótken kezdesýde HAMAS ókilderi Kýshnerge Gaza sektoryn qarýsyzdandyrý jáne demılıtarızatsııalaý úderisin bastaýǵa daıyn ekenin málimdegen.
