Kúshik kezinen asyraǵan ıtim Pshon qabaǵan emes edi – Zámzagúl Jańabaeva
ATYRAÝ. KAZINFORM – Atyraý oblysynda kóktemgi sý tasqyny kezinde qap tasyǵan ıt túsirilgen beınejazba taraǵan edi. Bir aptada buryn, 27 qarashada sol ıtti atyp ketken. Buǵan ne sebep boldy?
Ittiń ıesi – Zámzagúl Jańabaeva. Onyń otbasy Mahambet aýdanynyń Sarytoǵaı aýylynda turady.
Buryn Sarytoǵaıda bólek aýyldyq okrýg bar edi. Keıin bul okrýg taratylǵan. Qazir Mahambet aýyldyq okrýgine qosylǵan.
– Jeke ıeliktegi úıimizde turǵasyn, ıt asyraǵymyz keldi. Sol sebepten, jıen aǵaıyma kúshik kerek dep aıtyp júrýshi edim. Ol Jalǵansaı okrýginde turady. Sol aǵaıymnan kúshik alyp, asyraǵan edik. Oǵan Pshon dep at qoıdyq, - deıdi Zámzagúl Jańabaeva.
Pshon atalatyn ıt týraly vıdeo bıylǵy kóktemgi sý tasqyny kezinde Jaıyq ózeniniń jaǵalaýynda túsirilgen. Vıdeodan ıttiń qap alyp kele jatqanyn kórýge bolady.
– Kóktemde turǵyndardyń bári ózen jaǵalaýyna bóget turǵyzýǵa shyqty ǵoı. Aýylymyzdy tasqyn sýdan qorǵaýǵa biz de atsalystyq. Sol kezde Pshon janymnan qalmaı, birge barǵan edi. Itim bos júrmesin dep, qap arqalatyp qoıdym. Kóptiń arasynda júrse de birde-bir adamǵa qaýip tóndirgen joq, - dedi Zámzagúl Jańabaeva.
Onyń aıtýynsha, ıtti ádeıi atqan. Biraq, jaraly ıt úıge kelgen.
– Buralqy ıtti atatyn arnaıy brıgada bar ǵoı. Jyl saıyn solar ıt atýǵa shyǵady. Biraq, bizdiń ıtimizge tımeýshi edi. It atýǵa okrýg ákimdiginen tapsyrys beriledi. Bul joly da ıt atýǵa tapsyrys berilgen. Kóshede júrgen buralqy ıtterdi atqanda, Pshon aýyl shetindegi lagerge qaraı qashqan eken. Sol kezde ony sońynan qýyp baryp, atyp ketipti. Muny kórgen aýyldastarym bar. Al, jaralanǵan ıtim úıge keldi. Keıin aýlada jatyp, ólip qaldy. Biraq, nege ekeni belgisiz, ıt atýshylar Pshonnyń óleksesin alýǵa kelmedi. Keshke deıin kúttik. Keıin óleksesin kómip tastadyq, - dedi ıt ıesi.
Al, Mahambet aýyldyq okrýginiń Sarytoǵaı aýylyndaǵy mamany Samal Jubanovanyń aıtýyna qaraǵanda, kóshede buralqy ıttermen birge Pshon da atylǵan.
– Iesinde bul ıtti tirketý týraly qujaty joq. Syrǵa da salynbaǵan. Qujaty bolmasa, buralqy ıt sanalady, -dep málim etti Samal Jubanova.
Ittiń qujaty da, syrǵasy da joq ekenin Zámzagúl Jańabaevanyń ózi de rastady.
– Meniń ıtim qabaǵan emes edi. Buralqy ıttermen yryldasyp, tóbelespeıtin. Tek bóten ıttiń aıaǵynyń ústinen basyp, sesin ǵana kórsetetin edi. Al, adamdarǵa da, malǵa da úrmeıdi. Tipti úıge kelgen adamǵa abalap úrgenin kórgen emespiz. Jýas bolǵanymen, ózimizge senimdi serik bolǵan edi. Kóktemde kóp adamnyń arasynda qap tasyp júrgende, ákimdik mamandary «Ittiń qujaty bar ma, syrǵasy qaıda?» dep nege aıtpady? Endi qujaty joq ekenin syltaýratyp, atýǵa tapsyrys berip otyr, -dedi Zámzagúl Jańabaeva.
It ıesiniń pikirinshe, Pshondy atýǵa burynda da birneshe tapsyrys bolǵan. Biraq, burynǵy brıgadanyń adamdary ony atýǵa qımaǵan.
– Búgin aýdandyq polıtsııa bólimi kúıeýimdi shaqyrdy. Ol polıtsııa qyzmetkerlerine bolǵan jaıt týraly túsinik berip keldi. Onda aýyldyq okrýg ákimdiginiń mamany «Buralqy ıtti atýǵa shaǵym tústi» depti. Bizdiń aýylda Pshondy atýǵa eshkim shaǵym bermegenine senemin. Biraq, adamǵa da, malǵa da zııany joq ıt atyldy. Endi ne isteı alamyz? Kúıeýim polıtsııa qyzmetkerlerine «Talabym joq» depti. Polıtsııaǵa ózim barsam, «Pshonnyń ornyna kúshik taýyp berińder» der edim, -deıdi Zámzagúl Jańabaeva.
Eske sala ketelik, kóktemgi sý tasqyny kezinde Atyraýda ıt te bóget salýǵa kómektesip júrgeni habarlanǵan edi.