#KúshimizBirlikte: Táýelsizdik taǵdyry úshin barlyq áreketke daıynbyz – Roza Muqanova

NUR-SULTAN. QazAqparat – Prezıdent Qasym-Jomart Toqaevtyń sońǵy oqıǵalarǵa jasaǵan úndeýine baılanysty zııaly qaýym da óz pikirin bildirip, Memleket basshysyn qoldap jatyr.

«Bizge bebitshilik qymbat! Táýelsiz eldiń bolashaǵy qymbat! Ár qazaqstandyqtyń ómiri qymbat! Biz halqy úshin ot jalynǵa oranyp turǵan prezıdent Qasym-Jomart Toqaevtyń ár qadamyn qoldaımyz», - dep jazdy aqyn, jazýshy Roza Muqanova FB paraqshasynda. «Prezıdent halyqqa qarsy qarý qoldanǵan búlikshiler tobyn aýyzdyqtaý úshin barlyq qadamdarǵa bardy. Qajet bolǵan jaǵdaıda Táýelsiz eldiń taǵdyry úshin barlyq áreketke daıynbyz. Alańda áskerılerdiń basy kesilip, domalap jatqanda úıde otyryp kúpinbeńder, baýyrlar. Feık jamylyp, halyqty aıdap salýshylar qudaıdan qorqyńdar!» dep jazady ol.

Al QR Jazýshylar odaǵy tóraǵasynyń orynbasary, aqyn Aqberen Elgezek elde túsimizge de kirmegen jaǵdaı oryn alǵanyn, qazir bos sóz sapyryp saıasat soǵatyn kez emes ekenin aıtady.

«Qaı qaısymyz ár jaqqa tartpaı, barlyq quzyretti qolyna alǵan Prezıdenttiń qasyna toptasýymyz kerek! Jaýdyń nysany – qasıetti táýelsizdigimiz. Syrttan kirip ketken terrorısterdiń maqsaty qoǵamda úreı týdyryp, baıraǵymyzdy jyǵyp, aıaqqa taptaý. Táýelsizdikten aıyrylsaq, eshteńe de kerek bolmaı qalady. Bir bolaıyq, aǵaıyn!» dep jazdy Aqberen Elgezek.