#Kúshimiz birlikte: El ishindegi búlikti tek birlik arqyly ǵana jeńe alamyz

NUR-SULTAN. QazAqparat – Sońǵy oqıǵalarǵa baılanysty Prezıdent Qasym-Jomart Toqaevtyń jasaǵan úndeýi halyq kóńiline úlken senim uıalatty. Úndeýde aıtylǵan sheshimderdiń barlyǵy nauqty sharalar retinde iske asýy tıis dep esepteımiz. Bundaı pikirdi Nur-Sultan qalasy bilim berýdi jańǵyrtý ortalyǵynyń ádiskeri Erǵazy Manapuly bildirdi, dep habarlaıdy QazAqparat.

«Elimizdiń ár óńirinde qymbatshylyqqa qarsy bastalyp, beıbit sherýge ulasqan mıtıńgti jat pıǵyldy arandatýshylar, keıinnen belgili bolǵandaı, lańkes sodyrlar óz maqsatyna paıdalanyp, halyqty ábigerge saldy. El úreılendi. Aımaqtarda, ásirese Almatyda oryn alǵan bassyzdyqtardyń kesirinen beıbit halyq zardap shekti. Áli de shegýde. Kóptegen ákimshilik, polıtsııa ǵımarattary órtenip, saýda oryndary men bankter tonaldy. Osyndaı qıyn sátte halyqtyń amandyǵyna kepil bolǵan Qasym-Jomart Toqaev der kezinde qajetti sheshim qabyldady. El amandyǵy úshin Ujymdyq qaýipsizdik týraly shart uıymyna múshe elderdiń bitimgerlik áskerin engizý óte durys sheshim boldy», - deıdi E. Manapuly.

«Aldyn ala daıyndalǵan lańkester oń-solyn tanymaǵan jastardy eliktirip, sońdarynan ertip, tártip saqshylaryna qarsy aıdap saldy. Lańkester jas sarbazdardy óltirip qana qoımaı, tipti adam shoshyrlyq áreketterge barǵanyn estidik. Bul naǵyz qara júrek jaýyzdyń ǵana qolynan keletin is. Ondaılardyń kózdegeni memleketti tóńkerip, táýelsizdikti tuǵyrynan taıdyrý. Ár ata-ana balasyn qadaǵalap, saqtaný sharalaryn qolǵa alsa eken. Osyndaı syn saǵatta elmen birge bolyp, beıbit halyqtyń ómirine kepil bolǵan Prezıdenttiń sheshimderin qoldaýymyz kerek. Osyǵan oraı, halyqty sabyrǵa shaqyryp, bılik tarapynan jasalyp jatqan barlyq is-sharalarǵa túsinistikpen qarap, qoldaý bildiremiz. El ishine oıran salǵan zobalańdy tek birlik pen yntymaq arqyly ǵana jeńe alamyz», - deıdi ol.