Kúshikti tirideı órtegender jaıly polıtsııa aqparat berdi
TALDYQORǴAN. QazAqparat – Almaty oblysynyń polıtseıleri kúshikti qapqa salyp órtegenderdi izdestirýde, dep habarlaıdy QazAqparat tilshisi.
Áleýmettik jelide jantúrshigerlik vıdeo taralýda.
Beınejazba avtorlary qapqa salynǵan kúshiktiń ústine benzın quıyp óltiretinin aıtady. Keıin osy sumdyq isti qoldarymen jasap, qýana vıdeoǵa túsiredi. Órtengen tirshilik ıesiniń jan daýysy shyǵyp, qappen qosa júgire jóneledi.
Almaty oblystyq Polıtsııa departamentiniń baspasóz qyzmeti bul jaıtqa baılanysty málimet berdi.
«Atalǵan fakti QR Qylmystyq kodeksiniń 316-baby ıaǵnı, janýarlarǵa qatygezdik tanytý boıynsha tirkeldi. Qazirgi ýaqytta Alakól aýdanynda qylmysty jasaǵandardy anyqtaý jáne olardy ustaý boıynsha keshendi tergeý sharalary júrip jatyr. Olar mindetti túrde zań aldynda jaýap beredi»,- delingen vedomstvonyń taratqan habarlamasynda.
