Kúshikti qyzyq kórip órtedik – Alakólde ustalǵan oqýshylar
TALDYQORǴAN. QazAqparat - Almaty oblysynda kúshikterdi órtedi degen kúdikpen ustalǵan eki oqýshy mundaı jaýyzdyqqa ne sebepti barǵandaryn aıtty, dep habarlaıdy QazAqparat tilshisi.
«2020 jyldyń 26 mamyrynda Almaty oblysy Alakól aýdany Qabanbaı aýylynyń janynda Dáýren ekeýimiz ıtti qyzyq kórip órtedik. Sol qylyǵymyz úshin keshirim suraımyz», - dedi Dıdar Shalqaruly esimdi 10-synyp oqýshysy.
Al onyń janynda bolǵan Dáýren esimdi 9-synyp oqýshysy Dıdarǵa kómekshi bolǵany úshin halyqtan keshirim suraıtynyn jetkizdi.
Kúshikti óltirdi degen kúdikpen ustalǵan Dıdar Shalqaruly Taldyqorǵan qalasy, Eńbek aýylyndaǵy meshittiń janynda ornalasqan jekemenshik qaıyrymdylyq mekemesiniń tárbıelenýshisi eken. Ol osy mekemede turady jáne orta bilim beretin mekteptiń keshki aýysymynda oqıdy. Biraq, koronavırýs indetine baılanysty qazir nysan jabyq tur.
«Dıdar Shalqaruly qaıyrymdylyq mekemesinde turady. Ol byltyr qyrkúıek aıynda osynda qabyldanǵan bolatyn. Bul jerde belgili ýaqyttarda ádebıet baǵytynda oqytamyz, jyr-dastan jattatamyz. Balalar ońdy-soldy áreketterge ketpes úshin odan bólek, dinı saýattaryn ashamyz. Al tereńdetip, bir baǵytta dinı uıymǵa kirgizý maqsatynda eshqandaı bala daıyndamaımyz. Ol baǵytta tálim-tárbıe bermeımiz», - deıdi «Taldyqorǵan» jeke qaıyrymdylyq mekemesiniń resmı ókili Erlan Berdibekov.
Málim etilgendeı, bul jerge áleýmettik jaǵdaıy tómen otbasylardyń balalary ǵana qabyldanady. Qyrkúıek aıynda ashylǵan mekemeniń qazir 20 tárbıelenýshisi bar. Mekeme ókilderi Dıdar Shalqarulynyń kúshikti tirideı órtegenin estip, jaǵalaryn ustap otyrǵandaryn aıtady.
Tirshilik ıesin aıýandyqpen óltirgen 15 jáne 16 jastaǵy balalardyń ústinen qazir qylmystyq is qozǵalyp, tergeý júrip jatyr.
D. Shalqarulynyń qasynda bolǵan Dáýren esimdi bala bir úıdiń jalǵyzy eken.
Esterińizge sala keteıik, qylmys Almaty oblysy Alakól aýdanynyń Qabanbaı aýylynda boldy. Eki bala qapqa salynǵan kúshiktiń ústine benzın quıyp, tirideı órtep jibergen. Bul isterin vıdeoǵa túsirip, áleýmettik jelige jarııalaǵan.
Jedel-izdestirý sharalary barysynda kúdikti retinde eki jasóspirim ustaldy.