Kúsheıtilgen rejımde qyzmet etýdiń nátıjeleri - QR Ádilet mınıstrligi QAJK
ASTANA. 14 jeltoqsan. QazAqparat /Ǵalymjan Hasenov/ - QR Táýelsizdik kúni qarsańynda qylmystyq-atqarý júıesiniń qyzmetkerleri rejımdi nysandar aýmaǵyna tyıym salynǵan zattardy ótkizetin birneshe oryndardy anyqtady,
dep habarlaıdy QR Ádilet mınıstrligi Qylmystyq atqarý júıesi komıtetiniń baspasóz qyzmeti.
Keshe Pavlodar qalasyndaǵy qatań rejımdi abaqtynyń baqylaý-ótkizý beketinde rejımdi nysan aýmaǵyna tyıym salynǵan zattardy ótkizip jibermekshi bolǵan 16 jastaǵy jasóspirim qolǵa tústi. Tárkilengen zattar arasynda 3 lıtrden astam spırt, alty shólmek konıak ishimdigi men 12 shólmek araq bar. Ákimshilik jazaǵa tartylatyn álgi ustalǵan balanyń aıtýynsha, ol abaqtyda otyrǵan dosyn mereke aldynda osy zattardy berip qýantqysy kelgen.
Astanada qamaý mekemeleri biriniń ónerkásip aımaǵy aýmaǵyna kirip bara jatqan «Gaz 53» markaly avtokólikti tekserý barysynda qylmystyq-atqarý júıesi qyzmetkerleri júrgizýshiniń is-áreketinen kúdiktengen. Quqyq qorǵaý qyzmetkerleri qatelespegen eken. Avtokólik kabınasynyń ishinde, oryndyqtar arasynda esirtki zattary, ıaǵnı 100 gramǵa jýyq gashısh pen 150 gramnan astatyn marıhýana tabyldy.
Mańǵystaý oblysy Aqtaý qalasynyń tergeý ızolıatorynda sottalǵan adamǵa 90 myń teńge kóleminde aqsha berip jiberý áreketiniń aldy alyndy. Aqsha áıel adamnyń qol sómkesinen tabylǵan.
Qylmystyq atqarý júıesi qyzmetkerleri men Shyǵys Qazaqstan oblysy Jarma aýdany ishki ister bóliminiń qyzmetkerleri tyǵyz baılanys ornata otyryp, Jańǵyz Tóbe kentindegi úılerdiń birin tekserý barysynda esirtki zattaryn tárkiledi. Sot-hımııalyq saraptama úsh kelige jýyq shóptiń marıhýana ekenin anyqtady. Bul esirtki zattary aımaqtaǵy abaqtylardyń birine ótkizýge arnalǵany anyq boldy.
