Kúsheıtilgen karantın: Almatyda monıtorıng toby qyz uzatý toıyn toqtatty
Ákimdik málimetinshe, 21-26 naýryz aralyǵynda qalada 98 tekserý júrgizildi, onda 1911 nysan qamtylyp, 300-deı belgilengen jumys rejıminiń buzylýy, epıdemııaǵa qarsy talaptardyń saqtalmaý deregi anyqtaldy. Sonymen qatar, 26-27 naýryz aralyǵynda túngi tekserý barysynda 17 buzýshylyq tirkeldi. Mysaly, 300 kásipkerlik sýbektisine 230 AEK kóleminde aıyppul salynady.
Bir apta ishinde maska rejımin buzǵany úshin QR ÁQBtK-niń 425-babyna sáıkes 693 jeke tulǵa jaýapkershilikke tartyldy.
Monıtorıng toptary anyqtap, jolyn kesken sharalar arasynda úılený toılary, otbasylyq jáne adamdar kóp jınalatyn ózge de merekelik is-sharalar bar. Mysaly, Áýezov aýdanynda 26 naýryzda saǵat 20.00-de «Aqsaı 4», № 15a mekenjaıyndaǵy «Dostar Saraıy» meıramhanasynda «qyz uzatý» sharasy toqtatyldy. Tıisti sharalar qabyldandy.
Erjan Babaqumarov sanıtarlyq-epıdemıologııalyq rejımdi buzý saldarynan koronavırýs juqtyrý jaǵdaılarynyń ósýi jalǵasyp jatqan aýdandarda monıtorıng toptarynyń jumysyn kúsheıtýdi tapsyrdy.
Aıta keteıik, Almaty epıdemıologııalyq jaǵdaı boıynsha áli de «qyzyl» aımaqta tur. Ótken táýlikte qalada 450 adamnan koronavırýs anyqtaldy. Burynǵysha 65 jastan asqan jáne sozylmaly aýrýlarmen aýyratyn adamdar táýekel tobyna jatady, olarǵa múmkindiginshe úılerinen shyqpaýǵa keńes beriledi.
Sonymen qatar, 20-29 jas aralyǵyndaǵy adamdar arasynda ınfektsııanyń ósýi baıqaldy.
Almaty ákimdigi qala turǵyndary men qonaqtaryn jaýapkershilik tanytyp, adamdar kóp jınalatyn oryndarǵa barmaýǵa, buqaralyq is-sharalardy uıymdastyrmaýǵa jáne qatyspaýǵa shaqyrady.
