Qushaq jaıa qarsy alǵan Qazaqstan halqyna dán rızamyn – AQSh-tyń Qazaqstandaǵy elshisi Denıel Rozenblıým
ASTANA. KAZINFORM – AQSh-tyń Qazaqstandaǵy elshisi Denıel Rozenblıým elimizdegi mansabyn aıaqtap, zeınetke shyqty.
- AQSh-tyń Qazaqstandaǵy Elshisi qyzmetin atqarý men úshin úlken mártebe boldy. Bul dostyqty nyǵaıtý, seriktestikterdi qalyptastyrý jáne eki el arasyndaǵy baılanysty kúsheıtýde birlesken jumys júrgizý sııaqty keremet úlken jol boldy. Bul tek sóz júzinde ǵana emes, is júzinde shynaıy jol boldy, - degen jazbamen bólisti Denıel Rozenblıým Instagram paraqshasynda.
Sondaı-aq AQSh elshisi qazaq tilinde úndeý joldady.
- Qurmetti Qazaqstan halqy, meniń qurmetti dostarym men áriptesterim. Siz biletindeı, jan-jaqty oılana kele, men 20 qańtardan bastap Qazaqstandaǵy AQSh elshisi qyzmetinen zeınetke shyǵý sheshimin qabyldadym. Birneshe aıdan keıin AQSh Memlekettik departamentindegi 28 jyldyq qyzmetten keıin zeınetke shyǵamyn. Ótken juma kúni men Qazaqstannyń barlyq 17 óńirin aralap shyqtym dep maqtanyshpen aıta alamyn. Qaıda barsam da, túrli sala men kásip mamandarymen júzdestim, barǵan jerimde meni qonaqjaılyqpen qarsy aldy. Meni qushaq jaıa qarsy alyp, ózderiniń tarıhymen, dástúrimen ashyq-jarqyn bóliskeni úshin men Qazaqstan halqyna dán rızamyn. Qazaqstanda kórsetken ystyq yqylastaryńyz ben qonaıjaılylyqtaryńyz úshin shyn júrekten alǵys bildiremin. Sonymen qatar Qazaqstan Úkimetine seriktestik úshin shynaıy rızashylyǵymdy aıtamyn. Biz birge kóp nársege qol jetkizdik. Eki el arasyndaǵy saýda baılanystaryn keńeıtip, bilimdi nasıhattadyq, áıelder men jastardy qoldadyq. Sondaı-aq Qazaqstannyń baı mádenı murasyn birge dáriptedik. Birlesken kúsh-jigerimizben beıbitshilik, qaýipsizdik jáne ekonomıkalyq órkendeý sııaqty ortaq maqsattarymyzǵa aıtarlyqtaı ilgeri bastyq, - dep qazaqstandyqtarǵa alǵys aıtty.
Prezıdent AQSh-tyń Qazaqstandaǵy elshisi Denıel Rozenblıýmdi qabyldaǵan bolatyn.