Kúsh qurylymdarynyń qaýqaryn kúsheıtýge 400 mlrd teńgeden astam qarjy bólinedi
Májiliste QR Qarjy mınıstriniń orynbasary Tatıana Saveleva qańtar oqıǵasynda zardap shekken shaǵyn jáne orta bıznes sýbektilerin qoldaýǵa bólinetin qarajattyń mólsheri naqtylanǵanyn málim etti.
«Bıýdjetti naqtylaý aıasynda kúsh qurylymdarynyń jaýyngerlik ázirligi men jaraqtandyrylýyn arttyrýǵa qosymsha 441 mlrd teńge qarastyrylǵan. Atap aıtqanda, qańtar oqıǵalarynyń saldaryn joıýǵa jáne ótemaqy tóleýge jalpy somasy 4,1 mlrd teńgege qarajat baǵyttalatyn bolady. Bul shyǵyndar zardap shekken tehnıkany, ǵımarattardy jóndeýge jáne qalpyna keltirýge baǵyttalady. Qazirgi ýaqytta qaza tapqan qyzmetkerlerdiń otbasylaryna qajetti járdemaqy men ótemaqy tólendi. Budan basqa, materıaldyq jáne turǵyn úı kómegin óńirler kórsetedi», - dedi vıtse-mınıstr.
Aıtýynsha, kúsh qurylymdary ókilderiniń sany men aılyǵyn kóbeıtýge 92 mlrd teńge bólinbek.
«Barlyq áleýetti organdardyń arnaıy bólimsheleriniń qyzmetkerleri men áskerı qyzmetshileri úshin eńbekaqy orta eseppen 20-dan 40%-ǵa deıin ulǵaıdy. Sondaı-aq, ІІM, Ulttyq ulan jáne Qorǵanys mınıstrliginiń arnaıy kólik quraldarymen jabdyqtalǵan arnaıy bólimsheleriniń sanyn arttyrý josparlanǵan. Materıaldyq-tehnıkalyq bazany tolyqtyrýǵa 91 mlrd teńge bólinedi. Onyń ishinde áskerı-kólik avıatsııasy parkine 15,5 mlrd teńge bólindi. Qabyldanǵan sharalar qoǵamdyq qaýipsizdik deńgeıin arttyrýǵa, daǵdarys jaǵdaılaryna jedel den qoıýǵa jáne tutastaı alǵanda kúshtik organdardyń bedelin arttyrýǵa yqpal etedi», - dedi Tatıana Saveleva.
Aıta keteıik, buǵan deıin QR Ulttyq ekonomıka mınıstri Álibek Qýantyrov jýrnalısterge Ulttyq qordan kepildendirilgen transfertti naqtylaý ne úshin qajet bolǵanyn túsindirgen bolatyn.
