Kúsh qoldana otyryp advokattyń kásibı qyzmetine aralasqandarǵa qatysty jaza kúsheıedi
Májilis depýtattarynyń bastamasymen QR Qylmystyq kodeksine osyndaı ózgeris engizilýi múmkin.
«Advokatqa qatysty kúsh qoldana otyryp zańsyz jeke uıǵarym nemese jeke qaýly shyǵarýdan, advokatty is boıynsha qabyldanǵan tapsyrmadan bas tartýǵa jáne zań kómegin kórsetý týraly jasalǵan sharttan bas tartýǵa májbúrleýden, advokatty nemese onyń úı-jaıyn zańsyz tintýden nemese jete tekserýden, advokattyq qupııany quraıtyn málimetter men qujattardy zańsyz talap etýden jáne alyp qoıýdan, advokattyń klıentpen kezdesýiniń qupııalylyǵyn buzýdan, advokatqa qatysty zańsyz jasyryn tergeý áreketterin júrgizýden, advokattan kýá retinde zańsyz jaýap alýdan, advokatty ustaýdan, advokatty qorǵalýshyǵa ne múddeleri úshin úshinshi tulǵalar zań kómegin kórsetý týraly shart jasasqan adamǵa jibermeý – 10 jylǵa deıingi merzimge belgili bir laýazymdardy atqarý nemese belgili bir qyzmetpen aınalysý quqyǵynan aıyra otyryp, 5 jylǵa deıin bas bostandyǵynan aıyrýǵa jazalanady», - delingen Qylmystyq kodekstiń jańa redaktsııasynda.
Aıta keteıik, kodekstiń qoldanystaǵy nusqasynda atalǵan sıpattaǵy qylmystar úshin jazǵa tartatyn arnaıy tarmaq joq.
«Qorǵaýyndaǵylarǵa zań kómegin kórsetý protsesi úzdiksiz sıpatqa ıe bolǵandyqtan, advokattardy jiberýden bas tartý sózsiz tolyq qorǵaýdy júzege asyrý múmkin bermeıdi, ıaǵnı, kúzetpen ustalatyn adamdardyń quqyqtarynyń buzylýyna ákeledi. Osyǵan baılanysty naqty is-qımyldardyń tizbesin mynalarmen tolyqtyrý qajet: «advokatty qorǵaýyndaǵy adamǵa ne onyń paıdasyna úshinshi tulǵalar zań kómegin kórsetý týraly shart jasasqan adamǵa jibermeý». Advokattyń zorlyq-zombylyqty qoldanýmen zańdy qyzmetine kedergi keltirgen jaǵdaıda neǵurlym qatań sanktsııa engizýdi kózdeý qajet. Mundaı jaǵdaılar praktıkada oryn alýda», - dep túsindirme berilgen engizilgeli otyrǵan ózgeriske.
